Арассыыйаҕа — Дьиэ кэргэн, Саха сиригэр — Оҕо саас, Сунтаар улууһугар — Аҕам саастаахтарга ытыктабыл сылларынан Улуу Кыайыы 79 сылын көрсө сэрии бэтэрээнэ Петр Гаврильевич Емельянов уонна тыыл бэтэрээнэ Анна Лукинична Алексеева ааттарын үйэтитэн «Түргэн куб» хомуур күрэһэ куйаар ситимин нөҥүө улууска оскуола иннинээҕи саастаах оҕолорго уонна кинилэр төрөппүттэригэр ыытыллыаҕа.
Санатан ааһар буоллахха, «Түргэн куб» хомуур күрэх оонньууну биир дойдулаахпыт, Петр Гаврильевич, Анна Лукинична төрөппүт уоллара Владимир Емельянов толкуйдаан, айан таһаарбыт ааптарыскай, олус умсугутуулаах оонньуута буолар. Кини 2015 сыллаахха Улуу Кыайыы 70 сылыгар төрөппүттэрэ 100 уонна 90 сылларыгар анаан, кулун тутар 27 күнүттэн Дьокуускай-Сунтаар-Маар Күөл хайысханан, «Аҕам сэрииттэн эргиллибит суолунан» диэн ураты айаны түстээн, эт атаҕынан 1100 км сүүрэн, ыам ыйын 9 күнүгэр төрөөбүт дойдутугар Маар Күөлгэ тиийбитэ. Уһун сүүрүүтүн устатын тухары, тохтообут нэһилиэгин аайы бу кубик хомуйуута оонньуутун күрэхтэһии быһыытынан ыыппыта. Билигин «Түргэн куб» хомуур күрэҕэ оонньуу өрөспүүбүлүкэбитигэр киэҥник тарҕанан араас таһымнаах күрэхтэр ыытыллар буоллулар. Күрэх сыала-соруга эти-хааны чэбдигирдии, өйү-санааны сайыннарыы, оонньууну киэҥ эйгэҕэ тарҕатыы буолар.
Сайаапкалары тутуу ыам ыйын 2-8-с күнүгэр диэри. Түмүк ыам ыйын 13 күнүгэр тахсар. Кыттааччылар: оскуола иннинээҕи улахан саастаах оҕолор (5-6 сааст.), кинилэр төрөппүттэрэ (уол, аҕа; кыыс, ийэ). Күрэх кэтэхтэн ыытыллар. Видео хаачыстыбата техническай ирдэбилгэ, сыанабылга эппиэттиир, биир кэлим, монтааһа суох буолуохтаах уонна устууга сөкүүндэ булгуччу көстөрө ирдэнэр. I, II, III миэстэни ылбыт кыттааччылар дипломунан, мэтээлинэн наҕараадаланыахтара. Миэстэни таһаарыы кыттааччылар төһө түргэн бириэмэнэн кубигы хомуйбуттарынан быһаарыллар.
Маар Күөл нэһилиэгин «Кэнчээри» уһуйаана бу күрэҕи Улуу Кыайыыны көрсө кыайыыны уһансыбыт үтүө дьоммутун үйэтитэн 2016 сылтан саҕалаан сылын аайы ыытар. Быйыл улууска кэтэхтэн күрэҕи ыытарга санананнар, хас биирдии уһуйаантан кыттарга ыам ыйын 8 күнүгэр диэри электроннай почтаҕа kencheeri1968@mail.ru сайаапкалары күүтэллэр.
Сиһилии ыйытыыларгытын бу нүөмэринэн билсиҥ:
Ф.С. Григорьева–89627316278
А.П. Яковлева– 89656767761
Алена ИВАНОВА