2024 сыл Арассыыйаҕа — Дьиэ кэргэн, өрөспүүбүлүкэбитигэр — Оҕо саас, Сунтаарбыт улууһугар — Аҕам саастаахтарга ытыктабыл сылын, оттон Уһун Күөл нэһилиэгэр Аҕа сылын аһар үөрүүлээх күн буолан ааста. Тэрээһини нэһилиэкпит баһылыга Иван Игнатьев эҕэрдэ тылынан арыйда. Үөрүүлээх быһыыга-майгыга «Ытык Аҕа» бэлиэ Ефремов Виктор Иннокентиевичка, «Нэһилиэк аҕам саастаах ытык киһитэ» бэлиэни Данилова Евдокия Ивановнаҕа туттардылар. Бу сылга биһиги нэһилиэккэ Гаврил, Рита Ивановтар уонна Жанна, Даниил Федоровтар дьиэ кэргэттэригэр уол уонна кыыс оҕо күн сирин көрдүлэр. Кинилэр дьиэ кэргэттэригэр истиҥ эҕэрдэлэр этилиннилэр. Бу күҥҥэ өссө биир саҥа ыал эбилиннэ — Мария уонна Иван Наумовтар сокуонунан ыал буоллулар.
Саҥа сылбытын бу курдук элбэх үөрүүлээх түгэннээх арыйдыбыт.
Виталина КОНСТАНТИНОВА,
«Сарыал» култуура киинин директора