Сунтаарга 2014 сылтан сэтинньи 11 күнүн хабылык күнүн бүтүн улууһунан бэлиэтиибит. Хабылыгы былыр- былыргыттан саха дьоно умсугуйан оонньуура. Ордук оҕо аймах бэркэ мөккүhэн, күрэхтэhэн сиргэ төгүрүччү олорон эбэтэр остуолга, олоппоско оонньууллара – эт-хаан, өй-санаа өттүнэн сайдыытын туоhутунан буолар. Хабылык тарба5ы сайыннарар, тулууру, сымсаны эрчийэр оонньуу. Тарбахтар төhөнөн сымсатык туттан хамсаналлар да, соччонон мэйии былчыҥнарын үлэлэрэ күүhүрэр, толкуйдуур дьоҕура сайдар, оҕо кыра сааhыттан дэгиттэр сайдыылаах буола улаатарыгар олук уурар. Сымса, булугас өйдөөх , түргэн толкуйдаах буолар.
Билигин хабылык хамаҕатык атыыланар. Киhи бэйэтэ да оҥостуон сөп. Оҕо күн аайы оонньоотоҕуна тарбахтара ордук сайдаллар, оонньуулара тупсар, илиилэрэ имигэс, хомуйа тутан ылаллара түргээтиир.
Хабылык күнүн чэрчитинэн, Борис Игнатьев аатынан Дьаархан орто уопсай үөрэхтээhин интернат-оскуолатын уһуйаанын оҕолоро, төрөппүттэрэ, үлэһиттэрэ саха остуолун оонньуутун оройуттан туттулар. Хабылык хабаннар үөрэн-көтөн, тарбахтарын хамнатан, илиилэрин эрчийэн туруктарын көннөрдүлэр. Остуол оонньуутугар улууска буолар күрэхтэһиилэргэ ситиһиилээхтик кыттар төрөппүппүт Маргарита Абдалова, былыргылыы уонна аныгылыы хабылыкка, хаамыскаҕа маастар-кылаас, күрэх ыытта. Иитээчи Туйаара Игнатьева «Сонор» остуол оонньуутун билиһиннэрдэ .
Төрөппүттэр оҕолоргутун кытары бииргэ оонньооҥ, оҕолоргутун сайыннарыҥ диэн сүбэлиибит.
Анна АНДРЕЕВА