3 №-дээх “Чебурашка» оҕо сайдар киинэ сылын аайы Улуустааҕы хаамыы уонна ырыа күрэҕин улуус уһуйааннарын икки ардыларыгар тэрийэн ыытар. Быйыл 2025 сыл – Арассыыйаҕа Аҕа дойду көмүскээччи, Саха сиригэр Ийэ дойдуну көмүскээччи, Улуу Кыайыы 80 сылыгар ананан тэрилиннэ. Бу күрэс сүрүн хайысхатынан оҕону кыра сааһыттан төрөөбүт дойдуга тапталы, бэриниилээх буолууга, патриотическай өйгө-санааҕа, тыыҥҥа иитии буолар.
Олунньу 18 күнүгэр В.Г.Павлов аатынан Сунтаардааҕы алын сүһүөх оскуола спортивнай саалатыгар барыта 7 уһуйаан хамаандаларын бэлэмнээн ситиһиилээхтик кытыннылар. Ол курдук, “Мичээр” Кутана, “Күнчээн” Күндэйэ, Кэмпэндээйи оскуолатын уһуйааннара, Сунтаартан “Чебурашка”, Ньургуһун”, “Солнышко” оҕо сайдар кииннэрэ кыттыыны ыллылар. Хас биирдии хамаанда күүскэ бэлэмнээхтэрин көрдөрдүлэр.
Күрэс икки түһүмэҕинэн ыытылынна. Бастакы түһүмэххэ хамаандалар байыаннай пуормалаах, хамандьыыр хамаандатын толорон, уҥа-хаҥас эргийдилэр, ырыа ыллаан байыаннай хаамыыны көрдөрдүлэр.
Дьүүллүүр сүбэҕэ байыаннай хаамыыга Гаврил Еремеев — В.Г. Павлов аатынан Сунтаардааҕы алын сүһүөх оскуолатын салайааччыта, Надежда Павлова — улуус үөрэҕириитин оскуола иннинээҕи салаатын сүрүннүүр специалиһа, Александр Михайлов – Сунтаардааҕы оҕо спортивнай оскуолатын тириэньэрэ үлэлээтилэр. Оттон “Малые игры ГТО” Уйусхан Егоров, Сунтаар улууһун физкультураҕа уонна спортка салаатын ГТО-ҕа кылаабынай специалиһа дьүүллээтэ.
Түмүккэ байыаннай хаамыыга 1-кы миэстэ “Ньургуһун”, 2-с миэстэ “Чебурашка” оҕо сайдар кииннэрэ, 3-с миэстэни “Ёлочка” уһуйаан буоллулар. “Кыайыыга дьулуурун иһин” “Солнышко” оҕо сайдар киинин хамаандата ылла. “Бастыҥ отделения хамандьыыра” — Николай Спиридонов “Ньургуһун” оҕо сайдар киинэ. “Бастыҥ байыаннай пуорма” — “Күнчээн” Күндэйэ хамаандата. “Бастыҥ байыаннай ырыа” — «Мичээр” Кутана хамаандата анал ааттары ылары ситистилэр.
Иккис түһүмэххэ «Малые игры ГТО» нуорматын алта көрүҥҥэ хамаанда аайыттан түөртүү оҕо туттарарга холоннулар. Бу манна 10 м сүүрүү, биир миэстэттэн ырааҕы ыстаныы, 6 м теннис мээчигин сыалы таба быраҕыы, имигэс буолууга спортивнай ыскамыайкаҕа туран атаҕы токуппакка төҥкөйөн илиини аллараа уунуу, муостаҕа тайанан анньыныы, олорон эрэ көхсүнү көтөҕүү көрүҥнэрэ киирдилэр.
Алта көрүҥ түмүгүнэн, 6-7 саастаах кыргыттарга: 1-кы миэстэ — Милена Павлова “Чебурашка”, 2-с миэстэ – Злата Павлова “Чебурашка”, 3 миэстэ – Нарыйа Иванова “Ньургуһун” оҕо сайдар кииннэрэ буоллулар.
Алта көрүҥ түмүгүнэн, 6-7 саастаах уолаттарга: 1-кы миэстэ – Алмаз Лазарев “Чебурашка”, 2-с миэстэ – Дьулус Сидоров “Ньургуһун”, 3-с миэстэ – Николай Спиридонов “Ньургуһун” оҕо сайдар кииннэрэ.
Улуустааҕы хаамыы уонна ырыа күрэһигэр күүскэ бэлэмнэнэн кэлэн кыттыыны ылбыт уһуйааннар хамаандаларыгар, салайааччыларыгар, күрэҕи сыаналаабыт дьүүллүүр сүбэҕэ улахан барҕа махталбытын тириэрдэбит.
Үөрэх управлениетын пресс-сулууспата