Биһиги Сунтаардааҕы 1-кы №-дээх оскуола 8″в» кылаас үөрэнээччилэрин театр кэрэ эйгэтигэр, саха норуотун фольклоругар угуйбут уһуйааччыларбытынан Айсен Федоров уонна Юрий Очосов буолаллар. Ол курдук театральнай студия «Маскарад» диэн ааттаах куруһуокпут 5-с кылаастан үлэлиир. Элбэх улуус уонна өрөспүүбүлүкэ ситиһиилэрдээх. Онтон «Удьуор» фольклорнай ансаамбыл тэриллибитэ 1сыла буолла. Кыра бириэмэ иһигэр Айсен Михайловичтыын ситиһиибит, кыайыыбыт элбэх.
Бэҕэһээ бэлиэ күн Уһуйаачыга ананна. Ким да умнубат үөрэппит учууталларын, кынат аспыт, көччөх гынан көтүппүт, олох аартыгар үктэннэрбит күндүтүк саныыр дьонун. Кинилэр үтүөлэринэн идэлээх дьон буоллахпыт, норуот араас салааларыгар үлэлии-хамсыы сылдьаллар, сылдьыахпыт. Махтал буоллун ийэлии эйэҕэс сыһыаннаах бастакы уһуйааччыга.
Талан ылбыт идэҕитигэр талааҥҥытын аһан, ситиһиилээхтик үлэлээн төһөлөөх элбэх оҕоҕо сырдыгы сахпыккытын, билиини иҥэрбиккитин, олох суолугар атаарбыккытын бэйэлэрэ билэн эрдэхтэрэ, санааларыгар саһыардахтара, сүрэхтэригэр сөҥөрдөхтөрө…
Баҕарабыт уһуйааччыларбытыгар сиэттиһэ сылдьар ситиһиини, кэккэлэһэ сылдьар кыайыыны, кытаанах доруобуйаны, истиҥ эйгэлээх махталы. Үөрэнээччилэргит мичээрдэрэ , иитиллээччилэргит кэрэкэ тыллара, үтүө баҕалара дьоллоох олох аартыгын күннэтэ арыйарга үктэл буолуохтун диэн алгыспытын аныыбыт.
Аюлина АНИСИМОВА,
Сунтаар 1-кы №-дээх 8 «в» кылааһын үөрэнээччитэ