Ахсынньы 8 күнүгэр «Уһуйааччы уонна аҕа сүбэһит» сылын түмүктүүр Сунтаар иһинээҕи уһуйаан үлэһиттэригэр үөрүүлээх тэрээһин «Партизан» НАТК-ҕа буолан ааста.
Тэрээһини оскуола иннинээҕи үөрэхтээһини сүрүннүүр отдел салайааччыта Нина Павлова эҕэрдэ тылынан аста.
Сыл чэрчитинэн араас тэрээһиннэр, көрүү-күрэстэр, күрэхтэһиилэр ыытылланнар, үлэһиттэр идэлэрин таһымын үрдэтинэннэр бастыҥтан бастыҥнар наҕараадаланнылар.
Аҕа сүбэһит ытык педагог-бэтэрээннэргэ махтал суруктаах бэлиэ уонна сибэкки дьөрбөтүн тутаннар үөрүүлэрэ үксээтэ. Маны таһынан, үөрэх уонна наука министиэристибэтин көҕүлээһининэн Саха өрөспүүбүлүкэтигэр сүүс бастыҥ педагог аата ааттаныллыбыта, ону тэҥэ, бастыҥ үлэлээхтэри бэлиэтээн туран, 100 тыһ. сертификат туттарыллыбыта. Оннук анал бириэмийэ сертификатын 5-с нүөмэрдээх «Ньургуһун» оҕо сайдар киинин иитээччитэ Алена Николаева тутта.
Айымньылаах, далааһыннаах үлэ кэмиттэн кэмигэр сыаналана турдун, оҕо мичээрэ, төрөппүт махтала айарга-тутарга кынаттаатыннар! Чэгиэн-чэбдик туругу!
Урсууна ФЕДОРОВА
үөрэх салалтатын сүрүннүүр исписэлииһэ