Үгүс сылларга алтыспыт, биир оскуолаҕа үлэлээбит, билигин бочуоттаах сынньалаҥҥа олорор кэллиэгэм Полина Семенова туһунан улууһум хаһыатын ааҕааччыларыгар кэпсиэхпин баҕарабын.
Кини 1988 с. күһүнүгэр Сунтаар 1 №-дээх оскуолатыгар учууталынан үлэлии кэлбитэ. Дьэ ол кэмтэн ыла мин Полина Николаевнаны билэбин. Кини бэйэтин үлэтигэр олус бэриниилээх, киэҥ билиилээх, кыһамньылаах, оҕолорго сымнаҕас сыһыаннаах эрээри ирдэбиллээх учуутал быһыытынан бэйэтин көрдөрбүтэ. Кылааһыгар оҕото куруук толору буолара. Ол курдук, кини дьон билиниитин, эрэлин ылбыта. Оҕолорун Полина Николаевна кылааһыгар үөрэттэрэ биэрэр баҕалаах төрөппүт элбэҕэ. Биһиги бастакы оҕобут Лена кини кылааһыгар киирэр буолбутугар, үчүгэй учууталга түбэстэ диэн дьолломмут күммүтүн бу баардыы өйдүүбүн. Полина Николаевна олус сыралаһан үлэлээн оҕолор сотору кэминэн иҥнибэккэ ааҕар-суоттуур, суруйар, толкуйдуур буолан бараллара. Оҕобут түөрт сыл устата олус баҕаран туран үөрэммитэ. Оҕо үөрэнэр баҕатын көҕүтэн, үрдүккэ сирдээн иһии — бу учуутал үрдүк маастарыстыбатын арылхайдык көрдөрөр.
Мин төрөппүт, учуутал быһыытынан Полина Николаевнаттан үгүскэ үөрэммитим, онон киниэхэ махталым улахан. Оҕобут Лена лиссиэй олимпиадатын ситиһиилээхтик ааһан онно салгыы үөрэнэ киирбитэ. Үрдүкү кылаастарга история, обществознание олимпиадаларыгар кыайыылаах буолуталаабыта. Алын кылааска үөрэнэр сылларыгар Полина Николаевна иҥэрбит билиитэ, сатабыллара салгыы ситиһиилээхтик үөрэнэригэр, үлэлииригэр тирэх буолбуттарыгар саарбахтаабаппын. Билигин кыыспыт Элина Станиславовна экономист уонна юрист идэлэрин баһылаан МАО «АТП» дириэктэринэн ананан үлэлии сылдьар. Ол курдук Полина Николаевна үөрэнээччитэ, оҕобут Элина ханна да үлэлээтэр тэрилтэ төһүү үлэһитэ буолар.
Ити курдук үлэлээбитин устатыгар Полина Николаевна үөрэппит төһөлөөх элбэх оҕотун аартыгын арыйбыта, туһааннаах суолун төрдүн булларбыта буолуой! Кини сыралаах үлэтэ сыаналанан СӨ үөрэҕириитин туйгуна үрдүк ааты ылбыта, РФ Үөрэҕириитин уонна наукатын Бочуотунай грамотатынан наҕараадаламмыта.
Билигин Полина Николаевна кэргэнинээн сиэннэрин, хос сиэннэрин көрсөн, төһө кыайалларынан күүс-көмө буолан быр-бааччы олороллор.
Яковлева Татьяна Егоровна
СӨ үөрэҕириитин туйгуна ,
РФ иитиигэ уонна үөрэҕириигэ бочуоттаах үлэһитэ,
Иевлевтэр педагогическай династияларын чилиэнэ.