Түмсүүлээх үлэ үтүө түмүктээх

Бэҕэһээ Дьокуускайга «Народный фронт. Всё для Победы» диэн ааттаах байыаннай дьайыы кыттыылаахтарыгар көмөлөрүн иһин өрөспүүбүлүкэбит 7 бастыҥ волонтерыгар наҕараадалары туттардылар. Биһиги улууспутуттан наҕарааданы «Аҕа дойду буойуннарын дьиэ кэргэннэрин кэмитиэтин» Сунтаардааҕы бэрэстэбиитэлэ, улуус уопсастыбаннай сэбиэтин бэрэссэдээтэлэ Надежда Львова тутта.

Санатан ааһар буоллахха, «Аҕа дойду буойуннарын дьиэ кэргэннэрин кэмитиэтэ» өрөспүүбүлүкэбитигэр 2022 сылтан тэриллэн үлэлиир. Уопсастыбаннай кэмитиэт сүрүн соругунан байыаннай дьайыы кыттыылаахтарыгар, кинилэр дьиэ кэргэттэригэр араас хайысхалаах өйөбүлү оҥоруу буолар. Ол курдук, СВО кыттыылаахтара реабилитацияны баралларыгар, эмтэнэллэригэр, көрүллэр социальнай көмөлөрү туһаналларыгар, дьиэ кэргэннэрин социальнай кыһалҕаларын быһаарыыга докумуоннары сырсыыга о.д.а.

Сунтаарбытыгар кэмитиэт бу сыл от ыйын бүтүүтүттэн саҕалаан үлэлиир. Бу кылгас бириэмэ иһигэр кинилэр улуус үгүс нэһилиэктэригэр сиэккэ өрөр пууннарын астылар. «Харысхал» түмсүү тэриллэн сиэккэ өрөн, байыаннай дьайыыга сылдьар биир дойдулаахтарбытыгар гуманитарнай көмөнү хомуйан, тустаах дьоҥҥо баһыылкалары ыыталлар. Бу манна Мииринэй улууһун кытта ыкса сибээстээхтик үлэлэһэн «Алроса» хампаанньа баһыылкалары түргэн кэминэн босхо тириэрдэр. Тустаах дьон баһыылкалары тутан махталлара үгүс. Хаххалыыр сиэккэни хастыы да устууканы сакаастааннар байыаннай дьайыы кыттыылаахтара уоппускаҕа кэлэ сылдьан илдьэ бараллар. Өрөспүүбүлүкэбитигэр саамай улахан 170 кв.м. бүтүн хамаанда пуунун бүрүйэр хаххалыыр сиэккэни өрөн ыыппыттара. Бу манна ис сүрэхтэриттэн бэйэлэрин тус баҕаларынан көмө буолар дьон кытталлар. Ону тэҥэ, байыаннай дьайыыга сылдьар дьонноох ийэлэр, эбэлэр эмиэ бааллар.

Үөрүүлээх сонуну истэн Надежда Григорьевналыын сибээскэ тахсан сэһэргэстибит:
Кэмитиэккэ бу күн Сунтаарбыт улууһуттан эрэ буолбакка, атын улуустартан кытта ыйытыылар киирэллэр. Киирбит ыйытыылары ырытан көрөн баран тустаах салайааччыларга сурук суруйан түргэнник быһаарыныы ыларга кыһаллабыт. Сиэккэ өрүүтүгэр, гуманитарнай көмөҕө үп-харчы өттүнэн тус баҕаларынан көмөлөһөн дьон улахан өйөбүл буолаллар. Бу үрдүк наҕараада улахан хамаанда сыралаах, иллээх-эйэлээх, түмсүүлээх үлэтин түмүгэ буолар. Хас биирдии ис сүрэҕиттэн көмө буола сылдьар дьоммутугар улахан махталбын тириэрдэбин” , – диир Надежда Львова.

Түмсүү үлэтин атын улуустар көрөн холобур оҥостон эмиэ тэринэн үлэлээн эрэллэрин туһунан иһитиннэрэллэр.

 

 

Алена ИВАНОВА