Баай фантазиялаах, нэһилиэк историятын үйэтитиэн баҕалаах Сиэйэ сэлиэнньэтин төрүт олохтоохторо Октябрина, Алексей Максимовтар 2007 сыллаахха нэһилиэк олоҕун кэпсиир «Утум» түмэли аһаннар нэһилиэккэ, улууска, өрөспүүбүлүкэ да таһымыгар улахан сэҥээриини ылбыттара.
Сылтан-сыл түмэл экспоната элбээн, баай матырыйаал мунньуллан, сылдьар дьоно элбээн иһэр. Күн дьыл өксүөнэ хаарыйан дьиэ сарайа мөлтөөн, тэстэн түмэл экспонаттарыгар буорту буолар куттал тирээбитэ. Ону таба көрөннөр Мария Семенова оҕолоро, чуолаан кыра уол Прокопий Семенов сарай буолар профлист успуонсардаатылар. Баһылыктар кэмигэр өйөөн, тиэйэн аҕалтара охсоннор түмэл, балаҕан саҥа үрүттэммитин түмэл хаһаайката Октябрина Максимова улаханнык үөрэн кэпсээтэ.
Баһылыктар Александр Романов, Арсен Семенов салайыыларынан Сиэйэ көхтөөх эр дьоно түмсэ түһэн, икки күн тэбэн туран үлэлээн аһара махталлаах дьыаланы оҥордулар. Сиэйэ сайдарын, түмэл үйэлээх буоларыгар ис сүрэхтэриттэн кыһаллар олохтоохторго, успуонсардарыгар Семеновтарга хаһаайка ийэлии махталын тириэрдэр.
Бу курдук Сиэйэлэрин ис сүрэхтэриттэн таптыыр, патриот дьонноох буолан сиэдэрэйкээн Сиэйэбит күн түүн сайда, киэркэйэ турар.
Зинаида Федотова- Дьол Кыыма