Бүгүн «Сунтаар сонуннара» хаһыат эрэдээксийэтэ саастаах дьону аралдьытар, сынньатар , толкуйдатар өй оонньуутугар ыҥырбыттарыгар, аны тугу да билбэт буолбутум буолуо диэн улаханнык долгуйа-долгуйа киин кинигэ кыһатыгар тиийдим ээ. Сорох-сорохтор саха литературатын хасыһан көрдүбүт ээ диэн кэпсээннэр ыксата сырыттылар, хата тэрийээччилэрбит күлэ-үөрэ көрсөннөр уоскуйдубут.
Хаһыат үлэһиттэрэ Алена Иванова, Мира Афанасьева кудуххайдык сүрүн оонньуубутугар бэлэмнээн билсиһииттэн саҕалаан, араас салаабытын барытын үлэлэтэн көрдөөх, күлүүлээх оонньуулары оонньоттулар. Ол күлэн-үөрэн күйгүөрэ олорон өй тургутуутугар киирбиппитин билбэккэ да хааллыбыт. Кылаабынай эрэдээктэр эбээһинэһин толорооччу Яина Власьева кытаанах жюри эбит, бэйэтэ жюри бэрэссэдээтэлэ, бэйэтэ жюри чилиэнэ, быһаарыыта кырдьыктаах уонна мөккүһүллүбэт бүтэһиктээх эбит. Эдэр, аныгы технологияны толору баһылаабыт видеограф Дмитрий Ымычанов улахан экраҥҥа араас тылы сөпкө таайыыттан, сомоҕо домохтору ситэрииттэн, ыһыллыбыт буукубалары сааһылааһыҥҥа тиийэ араас оонньууну суруналыыс кыргыттарын кытта оонньотон сэргэхсийии бөҕөнү таһаардылар. Уол видеоҕа уһулла, хаартыскаҕа түһэрэн бу күнү үйэтиттэ. Ол быыһыгар урут хаһан да, ханна да оонньоммотох оонньууну хаһыат үлэһиттэрэ айаннар олус сэргэттилэр, сөхтөрдүлэр, астыннардылар. Ол курдук, улахан киэргэммит коробкаҕа үс араас предмети угаллар. Онон сирдэтэн хаһыат бүгүҥҥү нүөмэригэр ыстатыйаны булаҕын, биир мүнүүтэ иһигэр.
Бүгүн түөрт хамаанда күөн көрүстэ — киин балыыһа «Пульс», «Ньургуһун» түмсүү «Ньургуһун», ааҕааччылар уонна бибилэтиэкэ үлэһиттэрин холбоһуктаах «Сардаана», бибилэтиэкэ үлэһиттэрин «Ситим» хамаандалара. «Сунтаар сонуннара» бу аан бастаан маннык оонньууну ыытабыт диэтэллэр да, олох хаһыат үлэһиттэрэ диэх курдук, саҥаран-иҥэрэн, сөптөөхтүк салайа охсон, ыйытыылара барыта киэҥ толкуйдааҕа олох оһуобай. Өссө кэлэн кыттыбыппытыгар, оҕо сааспытыгар түһэн оонньообуппутугар, үөрбүппүтүгэр хата үлэһиттэрбит ис сүрэхтэриттэн махтаныы, бадаарак , наһаа үчүгэй оҥоһуулаах сертификат туттардылар. Бу буолар эдэр дьон кырдьаҕас көлүөнэҕэ ытыктабыллара, махталлара.
Тэрээһин улуус хаһыатыгар бу сыл иккис аҥаарыгар сурутууну көҕүлээн ыытылынна. «Сунтаар сонуннарын» сурута илик кыттааччылар хаһыаттарын сурутан икки куобаҕы биирдэ ыттылар.
Улууспут урбаанньыттара — «Корона», «Виктория» маҕаһыыннар сүрүн успуонсар буоланнар бириис олохтообуттар. Кинилэргэ биһиги, кыттааччылар, сүрдээх үчүгэй бэлэхтэри тутаммыт хаһыатчыттар махталларыгар кыттыһабыт.
Тапталлаах улууспут соҕотох «Сунтаар сонуннара» хаһыатыгар сырдык саҕахтары, киэҥ аартыктары!
Зинаида ФЕДОТОВА-Дьол Кыыма