С.А.Зверев-Кыыл Уолун аатынан УНАК иһинэн “Түһүлгэ” НФК (сал. Матрена, Иван Лазаревтар) Москва куоракка норуоттар икки ардыларынааҕы күрэскэ ситиһиилээхтик кытыннылар. Ол курдук, оҕолор дойдубут тэбэр сүрэҕэр икки тэрээһиҥҥэ кыттыыны ыллылар. Сэтинньи 16 күнүгэр Саха сириттэн ыҥырыылаах ыалдьыт быһыытынан бүтүн Арассыыйатааҕы норуоттар икки ардыларынааҕы “Белая юрта” бэстибээлгэ С.А.Зверев-Кыыл Уола туруорбут “Оһуор”, “Алгыс” үҥкүүлэрин толордулар. Бэстибээл ыалдьыттара тымныы, тыйыс айылҕалаах ыраах Саха сириттэн кэлбит оҕолор итии, сылааһынан умайар сүрэхтээхтэрин бэлиэтээн эттилэр. Онон түһүлгэлэр дьон биһирэбилин ылыахтарын ыллылар.
Оттон сэтинньи 17 күнүгэр норуоттар икки ардыларынааҕы “Золотая осень” күрэскэ “Талба Татыйаана” үҥкүүлэринэн муҥутуур кыайыылаах, “Ыстаппаанныы оһуокайынан” 1 үрдэл буоллулар. Ону тэҥэ, “Дьүүллүүр сүбэ биһирэбилэ” диэн анал ааты ыллылар, салайааччылара Матрена, Иван Лазаревтар бастыҥ үҥкүү кэлэктиибин салайааччылара буоллулар. “Талба Татыйаана” диэн тэтимнээх үҥкүүлэрин бу сайын ыһыахха сүрэхтээбиттэрэ. Дьүүллүүр сүбэ үрдүкү сценаттан оҕолор үҥкүүлэрин көрөн олус сөхпүттэрин, үүнэн эрэр көлүөнэ бэйэлэрин култуураларын, үгэстэрин сүтэрбэккэ илдьэ сылдьалларын биһирээбиттэрин эттилэр.
Матрена Лазарева “Түһүлгэ” НФК салайааччыта, үҥкүү туоруорааччы: “Оҕолорбун ыраах Москва куоракка күрэскэ, бэстибээлгэ кыттарбытыгар көмөлөспүт дьоммутугар — С.А.Зверев-Кыыл Уолун аатынан УНАК салайааччытыгар А.Д. Седалищевка, үлэһиттэргэ Г.М.Васильеваҕа, О.М.Еремееваҕа уонна И.Ф.Митинаҕа түгэнинэн туһанан, махталбын тириэрдэбин. Саамай айаммытыгар көмөлөспүт, оҕолорго умнуллубат түгэни бэлэхтээбит, кинилэр сайдалларыгар толору кыаҕы биэрэр күндү төрөппүттэрбэр итии-истиҥ эҕэрдэбин, махталбын этэбин. Бу кыайыы барыбыт ситиһиитэ буолар. Күрэскэ дойдубут араас муннугуттан, ону тэҥэ, тас дойдуттан 100-тэн тахса кэлэктиип кыттыыны ылла. Күүстээх киирсиини ааһан кыайыы үктэллэннибит. Оҕолорбунан киэн туттабын!”.
Оҕолору ситиһиилэринэн эмиэ эҕэрдэлээтибит. Дамир Потапов Сунтаардааҕы 1-кы №-дээх оскуола 11 кылааһын үөрэнээччитэ, “Түһүлгэ” НФК солиһа: “ «Түһүлгэ” кэлэктиибэ Москва куоракка сырыыбытыгар түөрт үҥкүүнү толордубут. Биһигини кытта салайааччыбыт Иван Лазарев барса сылдьыбыта. Бастакы күннэрбитигэр Москва куораты көрбүппүт. Сорохторбут маннык ыраах бастакы айаннара буолар. Бары тэрээһиннэргэ Сунтаарбыт былааҕын өрө тута сырыттыбыт. Сунтаартан сылдьабыт диэн киэн тутта этэбит. Мин Матрена, Иван Лазаревтарга 1-кы кылаастан Дьаархаҥҥа үлэлииллэрин саҕаттан дьарыктанабын. Үҥкүүлүүрбүн олуһун сөбүлүүбүн”.
Түһүлгэлэр бу курдук саха култууратын, үҥкүүтүн тарҕата сылдьалларыттан биир дойдулаахтара киэн туттабыт. Салгыы даҕаны ситиһиилэр кэлэ турдуннар.
Мира АФАНАСЬЕВА