Тыа сирин сайдыытыгар биир сүрүн хайысханан тыа хаһаайыстыбатын бородууксуйатын оҥорон таһаарыы буолар. Сунтаар улууһун Тойбохой сэлиэнньэтигэр сүөһү эбиилик аһылыгын бэлэмниир дьоҕус собуот былырыын үлэҕэ киирбитэ, салайаааччыта — Алексей Сидоров. Урукку бааһыналары чөлүгэр түһэрэн, сүөһү иҥэмтиэлээх эбии аһылыгын бэйэ күүһүнэн оҥорон таһаарыы тыа хаһаайыстыбатын биир көдьүүстээх салаата буолар. «Тойбохой» ТХПК бытарытыллыбыт комбикорму оҥорор, үс араас бурдугу: сэлиэһинэйи, ньэчимиэни, эбиэһи тэҥ өлүүскэнэн сикситэр агрегакка куталлар, итиннэ өссө эбии иҥэмтиэтин үрдэтээри, соломону, Кэмпэндээйи тууһун уонна цеолит мээккэтин эбэллэр. Көтөр, сүөһү иитиитинэн дьарыктанар дьон бэйэ сиригэр-уотугар оҥоһуллан тахсыбыт бородууксуйаны аһара сөбүлээн ылаллар. Манна күҥҥэ 4-5 туонна бэлэм аһылыгы оҥорон таһаараллар. Куулламмыт, дьилэй гына тигиллибит кууллаах уотурбаны сакаасчыттар күннэтэ ыла тураллар.
«Сунтаар сонуннара» улуус хаһыата