Тускуттан норуот бириэмийэтэ «Саамай киэргэммит маҕаһыын»

Сунтаарбытыгар биллэр-көстөр блогер, суруналыыс, уопсастыбанньык Тускулаана Горохова-Кобельянова тус баҕатынан «Норуот билиниитэ» бириэмийэни олохтоон туттарара үтүө үгэскэ кубулуйда. Бириэмийэ сүрүн уратыта куйаар ситимин нөҥүө дьон-сэргэ куоластааһынынан барар. Санатан ааһар буоллахха, бу иннинэ «Сунтаар сөбүлүүр атыыһыта», «Сунтаар сөбүлүүр үрүҥ халааттаах аанньала», «Сунтаар махтанар таксиһа»  хаһаайыттарын булбуттара.

Оттон бу сырыыга саҥа сыл үүнэр күнүгэр «Саамай киэргэммит маҕаһыын» ыйытык түмүгүнэн «Артемка» маҕаһыыҥҥа бириэмийэни туттарда. Бу маҕаһыыҥҥа сылдьыбыт эрэ киһи хаһыс да сылын бырааһынньык аайы киирээти кытта фотозона оҥорорун бэлиэтии, сэргии көрбүт буолуохтааххыт.

Тэрээһини Сунтаар улууһун дьокуттааттарын Сэбиэтин бэрэссэдээтэлэ Ульяна Попова көҕүлээһининэн, сүрүн бирииһи кини бэйэтэ туруоран улахан үөрүүнү бэлэхтээбитин туһунан @TUSCU бэлиэтиир.

Үтүө санаанан салайтаран тэриллибит бириэмийэ өссө да салҕанан дьону-сэргэни сырдыкка үтүөҕэ кынаттыы турдун!

Алена ИВАНОВА

Читайте дальше