Кулун тутар 18 күнүгэр Үөһээ Бүлүү улууһугар «Туругура, тупса тур, сарыал санаа — сахам тыла!» диэн ааттаах сугулааҥҥа Сунтаар улууһуттан 11 киһилээх улахан дэлэгээссийэ баран кэллибит. Биһигини В.Г.Павлов аатынан Сунтаардааҕы начаалынай оскуола дириэктэрэ Гаврил.Еремеев салайан илдьэ сырытта.
Бу улахан тэрээһиҥҥэ Үөһээ Бүлүү улууһун бары нэһилиэктэриттэн мустубуттар. Ыҥырыылаах ыалдьыттарынан физика уонна математика билимин дуоктара, өрөспүүбүлүкэ лисиэй — интэринээтин дириэктэрэ Иван Шамаев, ХИФУ педагогика уонна психология кафедратын доцена, педагогика билимин хандьыдаата Татьяна Никифорова, Мэҥэ Хаҥаластан улуус үөрэҕин салалтатын испэсэлииһэ Татьяна Дмитриева, Бүлүү куоратыттан «Саха сиринээҕи норуот педагогикатын ассоциациятын» бэрэссэдээтэлэ Еремей Чиряев о.д.а.
Сугулаан сүрүн мунньаҕын Үөһээ Бүлүү үөрэҕин салаатын начальнига Юрий Кынатов «Үөһээ Бүлүүгэ саха тылын үөрэтии туруга» дакылаатынан аста. Тэрээһин иккис чааһыгар нэһилиэк баһылыктара, оскуола дириэктэрдэрэ, уһуйаан салайааччылара, иитээччилэр, алын сүһүөх, саха тылын учууталлара, бибилэтиэкэ, култуура үлэһиттэрэ, төрөппүт кэмитиэтин салайааччылара, уопсастыбанньыктар үлэлэрин уопуттарын атастаһыыга көхтөөхтүк кытынныбыт, биэс түһүлгэнэн барыта 300-чэ киһи кыттыыны ылбыта да элбэҕи кэпсиир. Элбэх кыттааччы ордук мэдисиинэ билимин хандьытаата, невролог быраас, «Кустук» чөлүгэр түһэрэр киин үлэһитэ, биир дойдулаахпыт Гульнара Софронова «Ийэ тылынан иитии — оҕо мэйиитин үлэтигэр сабыдыала» үлэтин, Сунтаар улууһугар » Күөрэгэй» түмсүү үлэтин сырдаппыт Сардаана Афанасьева үлэлэрин уопутун олус сэҥээрдибит. Мин бэйэм саха тылын учууталларын түһүлгэлэригэр сырыттым. Бу түһүлгэни саха тылын үөрэтээччилэрин методхолбоһугун салайааччыта Галина Терентьева салайда.
Төрөөбүт тыл тула тыа сирин бүгүҥҥү кыһалҕатын туһунан Иван Ивановичтыын истиҥ санаабытын атастастыбыт. ХИФУ оскуола иннинээҕи саастаах оҕону үөрэхтээһин кафедратын доцена, педагогика билимин хандьытаата Людмила Попова патриотическай иитиигэ «Үрүйэчээн» бырагыраама оҥоһуллан сахалыы тылынан тылбаастанан тахсыахтааҕын сэҥээрэ иһиттибит. Мэҥэ Хаҥаластан үөрэх салалтатын сүрүн исписэлииһэ Татьяна Дмитриева «Ийэбиниин сахалыы ааҕабын» марафону хайдах киэҥ хабааннаахтык, ситиһиилээхтик ыыппытын олус сэргээн иһиттибит. Мин бу түһүлгэҕэ Элгээйибит нэһилиэгэр үлэлиир «Төрөөбүт тылбыт-төлө туппат төрүт баайбыт» бырайыак оҕо, ыччат төрөөбүт тылынан сайдар эйгэтин кэҥэтэр, дириҥэтэр сыаллаах «Оһуор» КК, Уйбаан Нуолур аатынан олохтоох модельнай бибилэтиэкэ, С.А.Зверев аатынан түмэл, оскуола бииргэ түмсэн үлэлиирбитин сырдаттым. Үлэбит түмүгүнэн киирбит этиилэргэ олоҕуран уураах ылынныбыт.
Бу тэрээһин ыытыллар кэмигэр баай матырыйааллаах оҥоһуктар, кинигэлэр быыстапкалара тэриллибит. Түмүккэ, Ийэ тылбытын хараанныыр үлэ үрдүк таһымҥа, дириҥ хорутуулаахтык, дьиҥнээх дьыалаҕа киирэр курдук ыытыллыбытыттан үөрэн туран, тэрээһиҥҥэ тэрийэн ыыппыт Сунтаарым улууһун, Үөһээ Бүлүү салалталарыгар, чуолаан баһылык солбуйааччытыгар Анна Улароваҕа, «Ийэ тыл» Дьаһабылын салайааччыта Бурхалей Макаровка, «Ийэ тыл» түмсүү салайааччытыгар Варвара Васильеваҕа улахан махталбытын тиэрдэбит.
Людмила ПАВЛОВА, П.Х.Староватов аатынан Элгээйи орто оскуолатын саха тылын,
литературатын учуутала