Ааспыт нэдиэлэҕэ Сунтаардааҕы политехническэй лиссиэй-интэринээт үрдүк категориялаах учуутала, СӨ норуотун уус-уран оҥоһуктарын маастара, СӨ керамистарын союһун чилиэнэ, Сунтаар улууһун норуотун маастара, «Иитии эйгэтин бастыҥ үлэһитэ» Сунтаар улууһун аҕа баһылыгын уонна СӨ «100 бастыҥ педагогтар» анал бириэмийэтин хаһаайына педагог Диана Вячеславовна Иванова-Туой-ДИ «Туой абылаҥар уйдаран» диэн ааптарыскай сэминээрэ тэрилиннэ. Сэминээр уһуйааччыларга, педагогтарга ананан билии-көрүү үллэстэр, тарҕатар сыаллаах үрдүк таһымҥа буолан ааста.
Сэминээр маҥнайгы түһүмэҕэ «Ай-Сатаа» технопарк дьиэтигэр буолла. Тэрээһин арыллыытыгар Людмила Пустолякова «Туой тойуга» диэн ырыатын Виктория Мойтохонова салайааччылаах «Кыталыктар» ансаамбыл Диана Вячеславовна солистаах сүрэхтэннэ. Сунтаар улууһун норуотун маастара Егор Тартаков кырыымпанан доҕуһуоллаан киэргэттэ.
Кэлбит ыҥырыылаах ыалдьыттар эҕэрдэ эгэлгэтин, үтүө тылларын эттилэр.
Бу күн Диана- Туой ДИ 20 сыллаах үлэтин сырдатта, араас ыытар күрэхтэрин туһунан кэпсээтэ, үөрэтэр оҕолорун ситиһиилэринэн сонун көрүүлэрин, былааннарын үллэһиннэ. Сахалыы сайаҕас элбэх астаах сандалытынан кэлбит дьону күндүлээтэ.
Күн иккис аҥарыгар «Сатабыл» мастарыскыайга экскурсия кэмигэр Диана Вячеславовна уһуйааччыта, аҕа сүбэһитэ Сунтаар улууһун норуотун маастара Роберт Софронов хаартыскаларын көрдөрөн кэпсээтэ. Кини худуоһунньук-керамис Николай Шарапов үөрэнээччитэ буолар. Өрөспүүбүлүкэ бастакы керамиһыгар уһуйуллубут, үөрэммит кэмнэрин эриэккэс, сэдэх хаартыскаларын туһунан кэпсээнин бары да сэргии көрдүлэр.
Ол кэннэ олус кэрэ эйгэлээх Туой-ДИ үлэлиир хоһугар туойунан от уматар иһити оҥоруу маастар-кылааһа буолла. Манна норуот эмчитэ Айархаана Алексеева туой иһиккэ оту уматан ыраастаныы туһунан сэһэргээн, сүбэ-ама биэрэн олус ураты тыыны киллэрдэ. Хомус алыптаах тыаһыгар бигэнэн, туой буордуун доҕордоһон, илии сылааһын иҥэринэн туой иһити оҥорор сатабылыгар үөрэннилэр.
Салгыы Арыылаах орто скуолатыгар өр сылларга технология учууталынан үлэлээбит, үөрэҕирии бочуоттаах үлэһитэ, РФ үөрэҕириитин туйгуна Розалия Иванова уонна эдэр эрчимнээх Тойбохой оскуолатын учуутала Татьяна Могусова бэйэлэрин уопуттарыттан үллэһиннилэр.
Түмүккэ төгүрүк остуол тула кэпсэтии санаа үллэстиитэ буолла. Кэлбит педагогтар ураты сэминээр буолла диэн астынан тарҕастылар. Инникитин өссө тэрээһиннэри кэтэһэбит диэн баҕа санааларын эттилэр.
Алена ИВАНОВА