РФ бэрэсидьиэнэ Владимир Путин «Тулаайах төрөппүт көрүүтэ-истиитэ суох хаалбыт оҕолору дьиэнэн-уотунан хааччыйыы» бырагырааманы олоххо киллэрэри тус болҕомтоҕо ылан, үлэ ситимнээхтик барар.
Өрөспүүбүлүкэбитигэр 2023 сылга барыта 347 тулаайах, 313 төрөппүт көрүүтэ-истиитэ суох хаалбыт оҕолор дьиэнэн хааччыллыбыттар.
Оттон биһиги улууспутугар 2023 сылга 10 тулаайах оҕо дьиэнэн хааччыллыбыт. Олортон 8-һа дьиэ сэртипикээтинэн Сунтаарга, Дьокуускай куоракка бэйэлэрин баҕаларыгар сөп түбэһэр бэлэм дьиэлэри ылбыттар. Бу күҥҥэ 59 сокуоннай саастарын сиппит киһи уочаракка турар. 2024 сылга дьиэнэн хааччыйыыга 9 сайабылыанньа киирбит.
Улуус баһылыгын социальнай боппуруостарга уонна имиджевай политикаҕа солбуйааччыта Гаврил Еремеев маннык иһитиннэрэр:
— Дьиэнэн хааччыйыы сокуонугар олоҕуран, тулаайах уонна төрөппүт көрүүтэ-харайыыта суох хаалбыт оҕолору биир кэлимнээх социальнай өйөбүл чэрчитинэн сылын ахсын оҕолору дьиэлиир туһугар, инники олохторун оҥостоллоругар, тирэх буолар үлэлэр кэмигэр толоруллан иһэллэр. 2022 сыллаахха Ил Дархан Айсен Николаев көҕүлээһининэн, Саха сиригэр дьиэ сэртипикээттэрин көрүү мэхэниисимэ киирбитэ. Бу сэртипикээти киһи бэйэтэ талан хамсаабат баайга-дуолга атастаһыан сөп. Бу саҥа ньыма дьиэнэн хааччыллыы уочаратын биллэ аҕыйатта, итиэннэ, тулаайах оҕолор дьиэнэн хааччыллар бырааптара олоххо киириитин түргэтэттэ. Уонна тус бэйэлэригэр 23 саастарын туолбут ыччаттарбытыгар бу ньыма ордук туһалаах дьиэ кэргэҥҥэ барыыстаах буоларын туһугар туһуламмыт.
Алена ИВАНОВА