Араас дьоҕурдаах, дьарыктаах, сатабыллаах дьону киһи сөҕө-махтайа көрөр. Кинилэр ураты кэрэни кыраҕы харахтарынан таба көрөн, эҥин дьикти оҥоһуктары оҥороллор. Бүгүн кэпсиир дьоруойум тарбаҕар талба талааннаах — Туйаара Никифорова. Кини Тойбохой нэһилиэгиттэн төрүттээх. Икки оҕолоох истиҥ иһирэх ийэ. Идэтинэн — психолог. Билигин Дьокуускайга олороллор.
Оҕо эрдэҕиттэн уруһуйдуурун сөбүлүүр кэрэ аҥаар баатанан харыйа оонньуурун оҥорор ураты дьарыктаах. Оонньуурдары 2022 сыллаахха Саҥа дьыл бырааһынньыгын саҕана оҥорон холонон көрбүт. Оонньуурдарыгар баатаны, полимернай глинаны, боробулуоханы, акриловай кырааскалары туһанар. Аан бастаан кыыллары оҥорон бэйэтин харыйатын симээбит. Ол кэннэ чугас дьоно сэргии көрөн, аҕыйах оонньууру сакаастаабыттар. Эһиилигэр эмиэ Саҥа дьыл иннинэ сэбиэскэй кэм 90-с сыллардаах оҕолоругар майгынныыр оонньуурдары оҥорбут. Интэриниэт ситимигэр уонна биллэрии сыһыарыыларыгар биллэрии таһаарбытын дьон сэҥээрэн сакаастар киирэн барбыттар. Оннук Саҥа дьыл бырааһынньыгар 60-ча оонньууру атыылаабыт. Ол иһигэр улахан 50 см курдук үрдүктээх Тымныы оҕонньору уонна Хаарчаананы оҥорбут. Дьон бэйэлэрин кыра сылдьалларын хаартыскаларыгар майгыннатан оҥотторон чугас дьонноругар бэлэхтииллэр. Ону тэҥэ остуоруйа дьоруойдарын сакаастыыллар эбит.
«Оонньуурдарбын оҥорорбор бастаан сюжетын толкуйдуубун, тугу гына сылдьарын, илиитигэр туох тутуурдаах, таҥастаах буолуохтааҕын ойуулаан көрөбүн. Интэриниэт ситимиттэн урукку оҕолор таҥастарын хаартыскаларын көрөммүн үтүгүннэрэбин. Сахалыы таҥастаах оҕолору эмиэ оҥорооччубун. Биир оонньууру оҥорорбор, хатарарбар, кырааскалыырбар икки күн барар», — диэн Туйаара кэпсиир.
Куукула оҥорон таһаарыы бэйэтэ туспа умсугутулаах үлэ. Хас биирдии оҥоһук ураты тыыннаах. Ону оҥорорго бириэмэ, тулуур уонна дьулуур наада буоллаҕа.
Алена ИВАНОВА