Арассыыйа үрдүнэн РФ Ис дьыала уорганнарын үлэһиттэрин күнэ сэтинньи 10 күнүгэр бэлиэтэнэр. Историяны сэгэтэн көрөр эбит буоллахха, 1917 сыллаахха, Өктөөбүрүскэй өрөбөлүүссүйэ кэнниттэн, РСФСР Ис дьыалаларга народнай комиссариата (НКВД) «революционнай общественнай бэрээдэги араҥаччылыырга » уураах ылынан оробуочай милиция тэриллибитэ. 2011 с. милиция аата уларыйан полиция диэн буолбута. Ол иһин, өр сылларга илдьэ сылдьыбыт «Милиция күнэ» идэлээх бырааһынньык аата олохтоохтук уларыйан, официальнай таһымҥа РФ Бэрэсидьиэнэ Дмитрий Медведев 2011 сыл алтынньы 13 күнүнээҕи 1348 №-дээх Ыйааҕынан “Российскай Федерация Ис дьыала уорганнарын үлэһиттэрин күнүнэн” бигэргэтиллибитэ.
Итини сэргэ бүгүн, сэтинньи 8 күнүгэр, Арассыыйа үрдүнэн сулууспаларын толоро сылдьан суох буолбут Ис дьыала уорганнарын үлэһиттэрин кэриэстиир суолталаах бэлиэ түгэн буолар. Бу чэрчитинэн, сылын ахсын Тойбохой нэһилиэгиттэн төрүттээх, сулууспалыы сылдьан суорума суолламмыт, эдэркээн уолаттар Аркадий Саввинов, Игорь Васильев уонна Михаил Иванов сырдык ааттарыгар кэриэстэбил күнэ ыытыллар. Бу да сырыыга Г.Е. Бессонов аатынан Тойбохойдооҕу кыраайы үөрэтэр түмэлгэ Ис дьыала отделын үлэһиттэрэ, бэтэрээнэ, уолаттар төрөппүттэрэ, чугас дьонноро, нэһилиэк олохтоохторо уонна үөрэнээччилэр кыттыылаах Кэриэстэбил күнэ ыытылынна. Бу тэрээһиҥҥэ, Клара Степановна Тихонова сүрдээх интэриэһинэй, киһини уйадытар, уолаттар сырдык ааттарын ахтан-санаан ааһар уруогу биэрдэ. Мустубут дьон, кини чуор куолаһынан өйдөнүмтүө гына кэпсиирин чуумпуран олорон иһиттилэр уонна бүтэһиккэ «Доҕордоһуу» ырыатын бары тэҥҥэ ыллаатылар. «Олоххут устата өрүү үчүгэйи уонна мөкүнү араара сылдьыҥ», – диэн Клара Степановна бэйэтин сүбэтин оҕолорго эттэ.
Бу кэннэ, сулууспаларын толоро сылдьан сырдык тыыннара быстыбыт уолаттар мемориальнай дуоскаларыгар курутуйан туран гирлянда, тыыннаах сибэкки дьөрбөтүн уурдулар, үтүө ааттарын кэриэстээн кыырай мэҥэ халлааҥҥа саа тыаһын үстэ дуораһыттылар.
Норуот туһугар, сокуон иннигэр үтүө суобастаахтык сулууспалыырга бирисээгэ биэрбит, кутталлаах идэни талбыт погоннаах хас биирдии үлэһиттэргэ сиргэ тиийэ сүгүрүйүөх, махтаныах тустаахпыт.
Елизавета ТИТОВА