Хас биирдии кинигэ күн сирин көрүүтэ – бу туһунан устуоруйа, үйэтитии, үтүө өйдөбүл.
Бэҕэһээ Кириэстээххэ «Тимир көлө аргыстаах» саҥа сонун ис хоһоонноох кинигэ биһирэмэ элбэх ыалдьыттаах ыытылынна.
Бу кинигэҕэ Кириэстээх, Куокуну нэһилиэктэригэр тырахтарыыһынан, суоппарынан араас сылларга үлэлээн ааспыт дьон үлэтэ сырдатыллыбыт. Барыта 94 киһи ахтыыта түмүллэн киирбит.
Ааптар биир дойдулаахпыт Олимпиада Иванова, билигин Дьокуускай куоракка олорор, үлэлиир. Олимпиада Дмитриевна өр сылларга «Кириэстээх» сопхуоска суоппардаабыта. Кэргэнэ Виталий Петровичтыын суоппар идэтин талан, биэнсийэҕэ тахсыахтарыгар диэри нэһилиэк, улуус социальнай-экономическай сайдыытыгар киллэрбит кылааттара үтүмэн.
Олимпиада Дмитриевна сайын аайы кэлэн дойдутугар сынньанан барар. Бу сырыытыгар кинигэ кэһиилээх кэлэн бар дьонун үөртэ. Үлэһит дьону үйэтитиигэ анаммыт кинигэ сүрэхтэниитин аһыллыытыгар кини туох санааттан маннык улахан үлэҕэ санаммытын, дьонтон хайдах ахтыы хомуйбутун, бэлиэ түгэннэри, ааспыт кэмнэри ахтан-санаан истиҥ кэпсэтиини олохтоото..
Бу кинигэ тахсарыгар көмө буолбут дьоҥҥо – «Кириэстээх» ТХПК дириэктэрэ Владимир Егоровка, Сунтаар улууһун тыа хаһаайыстыбатын управлениетын начальнига Владимир Анисимовка, Кириэстээх нэһилиэгин баһылыга Александр Григорьевка, биир дойдулаахпыт суруналыыс Анжелика Мотосоваҕа уонна механизатордар дьиэ кэргэттэригэр, оҕолоругар улахан махталын тириэрдэр.
Кэлбит ыалдьыттары Аман Иванов хомуһуннаах хомус нарын тыаһынан, оһуокай таһааран көрүстэ.
Истиҥ эҕэрдэлэрин нэһилиэк баһылыгын солбуйааччы Алексей Корякин, СӨ норуотун хаһаайыстыбатын үтүөлээх үлэһитэ, Сунтаар улууһун, Кириэстээх нэһилиэгин бочуоттаах олохтооҕо, СӨ тыатын хаһаайыстыбатын бэтэрээнэ Горн Платонов, 2010-2015 с. нэһилиэк баһылыгынан үлэлээн кэлбит Николай Максимов, бэтэрээн механизатор Иннокентий Намылов, «Кустук» уопсастыбаннай түмсүү (салайааччы Любовь Павлова), суоппар Игорь Степанов, үлэ бэтэрээнэ Лидия Данилова, ытык кырдьаҕас Василий Васильев, учууталлар Наталья Васильева, Сардаана Ушатова, Галина Варламова, Валентин Дорофеев, Аркадий Егоров, Анатолий Саввинов, АГАТУ кафедратын сэбиэдиссэйэ Валентина Яковлева эттилэр уонна кинигэ тула, үлэ туһунан кэпсэтиигэ кытыннылар.
Быйыл СӨ тыатын хаһаайыстыбатын үтүөлээх үлэһитэ Николай Афанасьевич Тотонов 90 сааһын туолуо этэ. Кини оҕолорун аатыттан Людмила Николаевна улахан бириистэри туруоран оонньуу тэрийбитэ эмиэ сонун буолла. Олимпиада Дмитриевна бэйэтин уус-уран оҥоһуктарын дьон сэргии көрдө. Маны таһынан сэбиэскэй былакааттардаах кинигэ быыстапката, баннернай истиэндэлэр турдулар.
Чахчыта да бары Кириэстээх сопхуос бөҕөргүүрүгэр, социальнай- экономическай сайдарыгар, араас салаа үлэлэри дьүөрэлээн үрдүк көрдөрүүнү ситиһэргэ механизатордар кылааттара улахан. Ол биир туоһутунан күн сирин көрбүт саҥа кинигэ буолла.
«Кириэстээхпит тимир көлө аргыстаах хоһуун дьоно сири таҥастыыр үлэҕэ, тутууга, тыа хаһаайыстыбатын бородууксуйатын оҥорууга, ыраах сирдэртэн тиэйиигэ-таһыыга инники күөҥҥэ тахсыбыттара. Онно көмүс кылааттарын киллэрсибит тырахтарыыстар, суоппардар, мэхээнньиктэр үтүө холобурдара умнуллуо суохтаах” – диэн бэлиэтээтэ ааптар Олимпиада Иванова.
Людмила ДАНИЛОВА, «Сунтаар сонуннара» хаһыат уопсастыбаннай кэрэспэдьиэнэ