Төрөөбүт тылга аналлаах Саха Өрөспүүбүлүкэтин орто анал үөрэх кыһаларын устудьуоннарын ортолоругар «Тииҥ мэйии» өрөспүүбүлүкэтээҕи интеллектуальнай оонньуу онлайн ыытылынна. Төрөөбүт тылга аналлаах интеллектуальнай оонньуу ааптара-Татьяна Иванова, Сунтаардааҕы технологическай колледж саха тылын учуутала. Кини иккис сылын «Тииҥ мэйии» өрөспүүбүлүкэтээҕи интеллектуальнай оонньууну ыытар. Быйыл 11 өрөспүүбүлүкэ орто анал үөрэҕин кыһаларыттан 83 устудьуоннар кыттыыны ыллылар. Дьүүллүүр сүбэ быһаарыытынан кыайыылааҕынан Р.И.Брызгалов аатынан транспортнай техникум устудьуона Зоя Мончурина(Мэҥэ-Хаҥалас улууһа) буолла. Бириистээх миэстэлэри ыллылар: 2 миэстэ-Андрей Кузьминов(Сунтаардааҕы технологическай колледж, Сунтаар улууһа), 3 миэстэ-Артур Антонов(Р.И.Брызгалов аатынан транспортнай техникум, Мэҥэ-Хаҥалас улууһа).
Хас биирдии норуот баайа — тыл буолар. Тыл хас биирдии омук историятын кэрэһитэ. Саха тыла сурук-бичик үөскүөн инниттэн көлүөнэттэн көлүөнэҕэ симэлийбэккэ бэриллэн кэллэ. Төрүттэрбитин кытары быстыспат күүстээх ситим салҕанан, үүнэр көлүөнэ төрөөбүт тылын билэригэр, хас биирдии үөрэх тэрилтэтэ, общественнай түмсүүлэр сомоҕолоһон үлэлээммит өбүгэлэрбит үгэстэрин, мындыр үөрүйэхтэрин, сиэрдэрин-туомнарын тутустахпытына, үлэбит үтүө түмүктэрдээх буолуоҕа.
Александра ПАВЛОВА (НИКОЛАЕВА)