Сунтаар улууһун дьаһалтата түөлбэнэн бэйэни салайыныы сайдыытыгар туһуламмыт гран биллэрбитэ. Бу тосхолго Кэмпэндээйи 300.000 солк. бырайыагы көмүскээн кыайыыны ситиспитэ. Маны нэһилиэк бэйэтин түөлбэлэринэн арааран араас хабааннаах бырайыактар олоххо киирэллэр. «Аартык» түөлбэ бу барыл көмөтүнэн саас каток оҥорон үлэлэппитэ. «Саһарҕа» түөлбэ түмэлгэ үйэтитии үлэтин оҥордо. Онтон «Арчы» түөлбэ 2023 сыл — төрөөбүт төрүт тыл сылыгар аналлаах саха тылын сайыннарар сыаллаах тэттик киинэлэри (видеороликтары) устан саҕалаата. Бырайыакка Сунтаартан Тускулаана, Алексей Степанов сценарийдарынан Ярослав Филиппов устан, таҥан сотору кэминэн киинэлэр сүрэхтэниэхтэрэ. Күүтүҥ! «Саха» НКИХ ханаалыгар тиийэ көстүөҕэ.
Тускулаана ГОРОХОВА-КОБЕЛЬЯНОВА.