Оҕо кыратыттан саҕалаан олох киэҥ аартыгар үктэниэр диэри төрөппүт уһуйаан, оскуола уопсастыбаннай олоҕор төһө кыаҕа баарынан кыттар. Быйылгы сылбыт Россияҕа – Дьиэ кэргэн, Сахабы сиригэр – Оҕо саас, оттон Сунтаарбыт улууһугар – Аҕам саастаахтарга ытыктабыл сыллара буолан, ханнык баҕарар тэрээһин бу үс сылы ситимнииргэ туһуланар.
Бүгүн А.П.Павлов аатынан Сунтаар 1-кы N-дээх орто оскуолатыгар маастар-кылаастардаах эмиэ биир ураты тэрээһиҥҥэ төрөппүттэр, эбээлэр, эһээлэр ыалдьыттаатылар.
Кэлбит ыалдьыттар «Тыын» үҥкүү ансаамбылын уонна 9 “б” кылаас кыргыттара «Оҕо саас», иккис кылаас кыргыттара “Мир похож на цветной луг!”, эмиэ иккистэр Анна-Мария уонна Антон Антиповтар «Ийэм кэлиэн иннинэ»диэн ырыаларын толорууларын сэргээн көрдүлэр, иһиттилэр.
Дириэктэри үөрэх-иитии чааһыгар солбуйааччы Дмитрий Михайлов оскуола уопсастыбаннай олоҕор мэлдьи көхтөөх кыттыыны ылар дьонугар быйылгы анабыл сыллар бэлиэлэрин 9 “в” кылаас төрөппүттэригэр — Максимовтар дьиэ кэргэттэригэр, оскуола бэтэрээн педагогар Людмила Игнатьеваҕа уонна бары хайысхаҕа барытыгар көхтөөх, ситиһиилээх 5 «б» кылаас үөрэнээччитигэр Ира Очосоваҕа туттарда.
Араас хайысхалаах маастар-кылаастарга кэлбит төрөппүттэр ханныгы сэргээбиттэринэн талан сырыттылар. Уһун кыһын кэннэ ураты сэргэх үчүгэй тэрээһин буолла диэн астыммыттарын этэллэр. Кинилэртэн холобур, элбэх оҕолоох дьиэ кэргэн ийэлэрэ Анна Николаевна, Виктория Иннокентьевна санааларын маннык үллэстэр:
— Тэрийээччилэргэ махтанабыт. Бу сааскы маҥнайгы күҥҥэ сөп түбэһэн тэриллибит буолан дуу, сэргэхсийии буолла. Холобур, ити үүнээйи маастар-кылааһа, харысхал оҥоруута үчүгэй баҕайы. Маннык тэрээһини өссө ыыта турдуннар. Төрөппүт быһыытынан, бу төһө даҕаны кыра оҕолоох буоллар уонна киэһэ хойукка диэри үлэлээтэрбит солбуйтаран оҕобут туһугар кэлэбит. Атын да төрөппүттэр оҕоҕут үөрэнэр оскуолатын ыытар тэрээһиннэригэр төһө кыалларынан кыттыһан, сылдьа сатыахха диэн санаалаахпыт. Билигин төрөппүт оҕону кытта алтыһыыта хомойуох иһин биллэ аҕыйаата. Маннык тэҥҥэ сылдьан этэргэ дылы, сыһыаны да тупсарыахха сөп. Уонна үчүгэй баҕайы музыкальнай нүөмэрдэри көрөн сүрдээҕин диэн астынныбыт.
Сааскы маҥнайгы күҥҥэ бу курдук төрөппүттэр, эбээлэр, эһээлэр сахалыы харысхал, браслет оҥордулар, үүнээйини бэрийиигэ сүбэ-соргу иһиттилэр, эр дьон кулун тутар 8 күнүн көрсө ас кырбыыр дуоска оҥордулар, сорохтор үҥкүүгэ дьарыктанан астынан тарҕастылар.
Юлия-Айархаана АЛЕКСЕЕВА