Киһи кыраттан үөрэр
Эйэҕэс мичээртэн,
Истиҥ көрүүттэн
Үтүө сыһыантан…
Сэтинньи 20 күнүгэр, Элгээйигэ «Оһуор» култуура киинигэр норуоттар икки ардыларынааҕы доруобуйаларынан хааччахтаах дьон күнүгэр «Сүрэхпит сылааһын эһиэхэ аныыбыт» диэн ааттаах бэрт сэргэх тэрээһин ыытылынна.
Кэмпэндээйи нэһилиэгиттэн Элгээйи сиригэр-уотугар доруобуйаларынан хааччахтаах дьону илдьэн араас көрүҥнэргэ кытынныбыт.
Тэрээһини Элгээйи олохтоох дьаһалтата, “Оһуор” култуура киинэ, У.Нуолур аатынан олохтоох бибилэтиэкэ, Элгээйи инбэлииттэрин түмсүүтэ иилээн-саҕалаан ыытта.
Барыта холбоон 5 нэһилиэк: Түбэйтэн, Устьеттан, Күндэйэттэн, Элгээйиттэн, Кэмпэндээйиттэн доруобуйаларынан хааччахтаах дьон мустан элбэх саҥа дьону кытта билистилэр, доҕордостулар.
“Илиибит сылааһын эгэлгэтэ” диэн оҕолор, улахан дьон оҥоһуктарын, ону тэҥэ коллекционердар муспут баайдарын көрүү быыстапката тэрилиннэ. Араас талааннаах да дьон баар эбит диэн сөхтүбүт, оҥоһуктары астына көрдүбүт. Тустаах дьон бэйэлэрин оҥоһуктарын аттыгар туран үлэлэрин кэпсээтилэр, сырдаттылар. Кэмпэндээйи нэһилиэгиттэн Ольга Пай уонна Роксанна Куртаева быыстапкаҕа кытыннылар.
Тэрээһин кыттыылаахтара Фольклор түмэлигэр уонна аатырбыт В.Андреев Айылҕа түмэлигэр сылдьан билиилэрин хаҥаттылар. Айылҕа түмэлин үлэһиттэрэ Кэмпэндээйилэри босхо сырытыннарбыттарыгар махталбытын тириэрдэбит.
Дьэ, уонна саамай бары долгуйа күүппүт улахан кэнсиэркэ доруобуйаларынан хааччахтаах дьоммут талба талааннарын үрдүк сыанаттан көрдөрдүлэр. Талба талаан күрэһигэр Кэмпэндээйилэр “Кылаан кыайыылаах” ааты ыламмыт сүргэбит олус диэн көтөҕүлүннэ.
Кыттааччылар тэрээһини үрдүк таһымҥа ааста диэн сыаналаатылар. Ол курдук, хас биирдии кыттааччыга барыларыгар анал аат олохтообуттара олус хайҕаллаах. Ол иһин, кыттааччылар бары илии тутуурдаах, өттүк харалаах дьиэлэригэр сырдык ыраас мичээрдээх астынан тарҕаспыттара.
Дьүүллүүр сүбэ быһаарар кэмигэр Элгээйитээҕи инбэлииттэр обществолара (салайааччы Александр Пахомов) туспа оонньуу оонньотон дьону сэргэхситтэ. Оонньууга кыттыбыт дьон бары бириис ылан үөрдүлэр-көттүлэр.
Чахчы да, киһиэхэ кыра да наада ээ… Ону тэрийээччилэр барытын эрдэттэн бэлиэтии көрөннөр, хас биирдии киһиэхэ ураты сыһыан, болҕомто уурдулар. Бөлөҕү салайан илдьэ барбыт киһи быһыытынан сэмээр хайҕыы, астына көрдүм.
Маны таһынан, хас биирдии нэһилиэк бэйэбит дьоммутугар сэмэй бэлэхпитин эмиэ туттардыбыт.
Күрэс түмүгүнэн Кэмпэндээйи нэһилиэгиттэн “Кылаан кыайыылаах” – Никита Семенов буолла.
Маны таһынан анал ааттары эмиэ ыллыбыт:
“Дьүүллүүр сүбэ биһирэбилэ” – Аркадий Игнатьев
“Көмүс куолас” – Ольга Пай
“Кыайыыга дьулуур” – Марк Куртаев (хаһан да үрдүк сыанаҕа тахсан микрофон туппатах эдэр киһи Элгээйигэ тиийэн саҥа сүрэхтэннэ).
Түмүккэ, бу маннык кустовой тэрээһини үрдүк бэлэмнээх ыыппыт Элгээйи олохтоох дьаһалтатыгар, “Оһуор” култуура киинигэр, У.Нуолур аатынан олохтоох бибилэтиэкэҕэ, Элгээйи инбэлииттэрин түмсүүтүгэр улахан махталбытын этэбит.
Аар Айыыларга махтаныахха!
Олох барахсаны уруйдуохха!
Күннэтэ үчүгэйи ыҥырыахха! диэн туран бука барыгытыгар доруобуйаны баҕарабын.
Анна Тотонова-Күн Күөрэгэйэ- Кэппэндээйи нэһилиэгин Сайдыы култуура киинин дириэктэрэ