Күндэйэ нэһилиэгэр барыта 1300-чэ төбө ынах сүөһү баар, ол иһигэр ыанар ынаҕа 500-чэ төбө буолар. Оттон бу нэһилиэккэ «Сырдык аартык» кэпэрэтиип хороҕор муостааҕы тутан, үрүҥ илгэни дэлэтэн үлэлээбитэ, атаҕар бигэтик турбута ыраатта.
Күн бүгүн кэпэрэтиип пайщиктаахтарга сүөһүнү көрүүгэ-харайыыга, иитиигэ өҥөнү оҥорууга сыал-сорук туоруорунан үлэлии олорор. Ол курдук, бастакы соруктарынан сайылыктары тэрийии, титииктэрин, күрүөлэрин-хаhааларын, олорор дьиэлэрин, суолларын оҥоруу-тутуу, механизациялааhын уонна электрическэй ситимҥэ холботуу буолар. Маны таһынан, мэччирэҥнэри күрүөлээн, пайщиктаахтартан үүтү тутан астаан, кыаммат, бүддьүөт үлэһиттэрин сүөһүлэрин уопсай хотоҥҥо харайан, нэһилиэккэ ынах сүөһү ахсаанын аҕыйаппат уонна сүөһүттэн ылыллар табаарынай бородууксуйаны элбэтэр, хаачыстыбаны тупсарар соруктаах үлэни ыыта олорор.
Быйыл «Сырдык аартык» кэпэрэтиип 47 ыалтан 320 төбө сүөһүнү, ол иһигэр 180 ыанар ынаҕы үс хотонунан кыстатан турар. Кэпэрэтиип пиэрмэтэ бөһүөлэктэн 1 км тэйиччи турар. Салайааччы Алина Львова этэринэн, билигин төрүөх саҕаланан 20-чэ ынах төрөөн турар. Пиэрмэҕэ 6 ыанньыксыт уонна ис-тас үлэҕэ 9 үлэһит күннэтэ мөхсөр. Оттон сүөһү аһылыгын былырыыҥҥа дылы 80 тн. комбикорманы сакаастаан олорбут эбит буоллахтарына, быйыл элбэтэн 134 тн. комбикорманы сакаастаан сыллааҕы хаһаастарын аҕалтаран олороллор.
Ити курдук, «Сырдык аартык» кэпэрэтиип биир санаанан, тыа хаһаайыстыбата сайдарын туһугар сыраларын ууран үлэлии-хамсыы сылдьаллар.
Елизавета ТИТОВА