Сылтан-сыл төрүт оҕунан ытыыны сэҥээрээччи элбиир

Ааспыт өрөбүлгэ Хатас нэһилиэгэр Улуу Кыайыы 80 сылыгар аналлаах төрүт оҕунан ытыыга «Бастакы оноҕос» аһаҕас турнир буолан ааста. Тэрийээччилэринэн СӨ төрүт оҕунан ытыыга федерацията, киин куораттааҕы Аҕалар Сэбиэттэрэ, Хатастааҕы И.И. Захарова аатынан оҕо-юношескай спортивнай оскуолата уонна «Хотой» СК буоллулар. Өрөспүүбүлүкэ бары муннуктарыттан дьахталларга 72 охчут, эр дьоннорго 66 кыраҕы харахтаах ытааччы кыттыыны ыллылар.

Манна биһиги улуустан Нюргуяна Петрова тириэньэрдээх бу көрүҥү сэргээн дьарыктанар 5 саҥа саҕалааччы охчут биирдиилээн бастыыр иһин күрэхтэстилэр. Ол курдук, Борис Уларов, Андрей Федоров, Иван Егоров, Софья Догойдонова уонна Ньургуйаана Малышева ситиһиилээхтик кытыннылар. Күрэхтэһээччилэр сахалыы таҥнан-симэнэн «Куобаҕы», «Куһу» уонна «Тииҥи» 20, 25 миэтирэ кэрчиктэн туран эрэ ыттылар. Күрэхтэһии түмүгүнэн, холонуу куһаҕана суох буолла. Ол курдук, дьахталларга Ньургуйаана Малышева 2-с миэстэҕэ тахсан сунтаардар үөрүүлэрэ үксээн кэллэ.

Елизавета ТИТОВА