Модун санааны үөскэтиэххэ наада!
Мин Кыайыаҕым диэн!
Мин Күүстээхпин диэн!
Мин Дьоҕурдаахпын диэн!
Мин Сахабын диэн!
Ол буолар Күүстээх итэҕэл …
Михаил Ефимович Николаев аата Саха сиригэр суhумнуур сулус кэриэтэ сүппэт-симэлийбэт аналлаах. Кэнчээри кэскилбит кини дойдутун туhугар солообут киэҥ суолун умнуо суохтаах.
Бүгүн Михаил Николаев тѳрѳѳбүт бэлиэ күнүгэр анаан, Сунтаардааҕы 3-с нүөмэрдээх оскуола 5-с кылааһын үөрэнээччилэригэр кылаас чааhа ыытылынна. Оҕолор М.Е. Николаев туһунан тугу билбиттэрин-истибиттэрин санааларын үллэhиннилэр.
Кайса Афанасьева, Зарина Иванова, Диана Наумова: «Бастакы Бэрэсидьиэммит Хаҥалас улууhун Ѳктѳмүттэн тѳрүттээх. Тѳрѳппүттэрэ түѳрт оҕолорун киhи киhитэ буолалларыгар ииппиттэрэ. Киhи быhыытынан үтүѳ, судургу майгылааҕа. Кимиэхэ барытыгар кѳмѳлѳhѳргѳ бэлэмэ. Михаил Ефимович кэргэнинээн Федора Никитичналыын үс оҕолоохтор. Оҕолоругар тѳрѳппүттэрин аатын хаhан да түhэн биэриэ суохтаахтарын этэллэрэ. «Хаhан баҕарар, ханна баҕарар киhиэхэ үтүѳтүк сыhыаннастахха, дьон-сэргэ убаастабылын ылаҕын», — диирэ бастакы президеммит. Норуотум туhа диэн сылдьар киhи диирэ кэргэнэ. Михаил Ефимович курдук Бэрэсидьиэннэнэ сылдьыбыппытынан киэн туттабыт».
Анджелина Мандарова: «Михаил Ефимович ѳркѳн ѳйдѳѳх, тобуллаҕас толкуйдаах. Омскайга ветеринарнай быраас үѳрэҕэр үѳрэммит, идэтинэн үлэлээбит. Онтон Yрдүкү партийнай оскуолаҕа үѳрэнэн, салайар идэлэргэ: министр солбуйааччыта, тыа хаhаайыстыбатын министрэ, Саха сирин обкомун секретарынан ананан үлэлээн, президеҥҥэ тиийбитэ. Норуот туhугар үлэлээбитэ-хамсаабыта. Норуот талбыт киhитэ».
Андрей Тарасов: «Саха сиригэр бастакы бэрэсидьиэни талыы быыбара ахсынньы 20 күнүгэр 1991 с., биhиги тѳрүѳхпүт 22 сыл иннинэ, буолбут. 90-нус сыллар ыарахан кэмнэр эбит. Михаил Ефимович Бэрэсидьиэн буолан баран, Саха сирин сайыннарыыга сыалын-соругун ууран үлэлээбит. Экономиканы сѳпкѳ туhаммыт, сайдар суолга, норуот олоҕун тупсарыыга анаан араас докумуон бэлэмнээбит, уураах ылбыт».
Ярослав Евсеев: «Михаил Николаев Саха сирин аан дойдуга ааттаппыт киhи. Тас дойдулары кытта бииргэ үлэлэhэргэ илии баттаспыта. Бу сайдыы суола буолар. Азия оҕолоро эйэлээх буоллуннар диэн, аан бастаан 1996 с. «Азия оҕолорун оонньуута» ыытыллыбыта. Онтон ыла 4 сыл буола-буола оонньуулар ыытылла тураллар. Тѳрѳѳбүт дойдубут сайдар, тупсар. Онно улахан ѳҥѳлѳѳх бастакы президеммит».
Никита Илларионов, Влад Старостин: «Михаил Ефимович Николаев Саха сирэ бары ѳттүнэн сайдан иhэригэр анаан араас улахан туhалаах тутуулары чэгиэн-чэбдик, чѳл олоҕу ѳрѳ туттуннар диэн араас хайысхалаах стадион, спорткомплекс, бассейн о.д.а. туттарбыта. Онон, Бэрэсидьиэммит тутуу сайдарыгар аан бастакы олугу уурбута. Онтон ыла дойдубутугар тутуу бѳҕѳ тутуллар».
Сергей Иванов, Алихан Сидоров, Айаал Никифоров: «Сахабыт сирэ алмааhынан аатырар-сураҕырар. Михаил Николаев саамай улахан ситиhиитэ АЛРОСАны тэрийии эбит. Алмаас быраhыанын ылан сайдыбыппыт, сайдабыт, сайдыахпыт. Дьоҥҥо саамай доруобуйа наадалаах. Ону ѳйдѳѳн туран, Михаил Ефимович аныгы медицинскэй тэриллээх медкиин туттарбыта. Онно дьоммут, бэйэбит баран доруобуйабытын кѳрдѳрүнээччибит. Билигин ким кѳмѳтүнэн тутуллубутун билэбит уонна махтанабыт».
Бу курдук үѳрэнээччилэрбит бастакы Бэрэсидьиэннэрин олус истиҥник, сылаастык кини туhунан билиилэрин кэпсээтилэр.
Михаил Николаев чахчы, норуотум туhа диэн үлэлээбитэ-хамсаабыта, сыратын-сылбатын биэрбитэ. «Саха буоларгытынан киэн туттуҥ» диирэ тумулук этии буолар.
Анна Алексеева, кылаас салайааччыта
Лидия Семенова, библиотекарь-педагог