Алтынньы 15 күнүгэр Сунтаардааҕы политехническай лиссиэй интэринээтигэр олорор оҕолору кытта Быыһыыр сулууспа үлэһитэ Марк Потапов көрсүстэ.
Кини кэпсээнин Дьаархан интэринээтигэр олорон үөрэммититтэн саҕалаата. Онно элбэххэ үөрэммитин, кэлин ол сатабыллара олоҕор улаханнык туһалыырын киэн тутта кэпсээтэ. Салгыы тэрилтэтин үлэтин билиһиннэрдэ, түгэн оҥорон оҕолор ыксаллаах кэмҥэ түбэстэхтэринэ бэйэлэрин хайдах харыстаналларын уонна атын оҕоҕо бастакы көмөнү хайдах оҥоруохтаахтарын төһө билэллэрин тургутан көрдө.
Оҕолорго туһалаах билиини уонна сүбэлэри биэрдэ, үлэтин туһунан сурунаалы, буклеттары бэлэхтээтэ.
Бу кэннэ Марк Леонидович элбэх оҕолоох дьиэ кэргэн аҕа баһылыга буоларын уонна анал байыаннай дьайыыга 6 ый сулууспалаан кэлбитин иһитиннэрдэ. Онно кэтэ сылдьыбыт «Дьаархан» диэн суруктаах кууркатын уонна бронежилетын көрдөрдө. Тутта-хапта сылдьардыын мындыр, хорсун көрүҥнээх, дойдутугар бэриниилээх эр бэрдин кытта көрсүһүүттэн оҕолор астыннылар, элбэҕи биллилэр.
Биһиги кэккэбитигэр маннык ыччаттар баалларынан киэн туттуоҕуҥ. Түгэн түбэстэҕинэ оҕолорбутун кытары элбэхтик алтыһыннарарбыт үтүө түмүктэрдээх буолуоҕар эрэнэбин.
Дмитрий ЫМЫЧАНОВ