Муус устар 11-12 күннэригэр Сунтаардааҕы технологическай колледж студеннара уонна производственнай үөрэхтээһин маастардара буолан, СВО-ҕа сылдьар уолаттар дьиэ кэргэттэригэр олбуордарын хаарын ыраастаан, тиэйэн-таһан биэрдилэр.
Сунтаар нэһилиэгин тэрилтэлэрэ СВО-ҕа сылдьар уолаттарын өйөөн, дьиэ кэргэттэригэр көмө араас үлэтин оҥоро сылдьаллар.
Уопсайынан, олохтоох дьаһалтаҕа хаары тиэйэргэ 19 сайаапка киирэн турар, ону барытын учуоттаан туран, толорорго үлэ ыытыллар.
Нэһилиэкпит иһигэр 90 СВО кыттыылаахтарын дьиэ кэргэттэрэ олороллор. Кэнники кэмҥэ хантыраак түһэрсэн, олохтоох уолаттарбыт СВО-ҕа бара тураллар.
Быйылгы дьылга хаар олус элбэх, нэһилиэк иһигэр сорох сирдэринэн ууга барар куттал баар. Ону сэрэтэргэ МАУ «Сунтар» тэрилтэ үлэһиттэрэ хаар тиэйиитин, суол ыраастааһынын уонна ууну аһарар турбалары ыраастыыр үлэтин күүскэ ыыта сылдьаллар.
Сунтаарга анал байыаннай эппэрээссийэ кыттыылаахтарыгар уонна кинилэр дьиэ кэргэттэригэр киэҥ өрүттээх көмө үлэтэ салҕанар.
«Сунтаар нэһилиэгэ» МТ дьаһалтата
