Бу күннэргэ ГАИ сулууспата суолга “Мотоцикл” уонна “Внимание- дети!” диэн сэрэтии операциялары ыыта сылдьар. “Мотоцикл” операцияҕа сүрүн болҕомтону матасыыкылы ыытар бырааба суох уонна тиэхиникэлэрин учуокка туруорбатах ыытааччылары бэрэбиэркэлиэхтэрэ. Ону тэҥэ, матасыыкылы бэйэни харыстанар шлема суох ыытар дьону тохтотуохтара. Сиһилии операция туһунан Сунтаардааҕы Ис дьыала органын суолга сэрэхтээх буолуу инспектора, полиция старшай лейтенана Андриан Корнилов иһитиннэрэр: “Аан бастаан нэһилиэнньэҕэ матасыыкылы ыытар быраап 2 көрүҥҥэ арахсар диэн быһааран биэриэххэ наада. А1 категорияҕа 125 кубка диэри күүстээх мотуордаах:”Минск”, “Орион”, “Альфа”, кыччыгый омук матасыыкыллара киирэллэр. Бу тиэхиникэлэри ыытар быраап18 сааһыттан бэриллэр. А категорияҕа 125 кубтан үөһэ күүстээх мотуордаах матасыыкыллар киирэллэр. “Юпитер”, “Урал”, “Стелс” уонна омук матасыыкыллары 21 сааһыттан ыытар көҥүллэнэр. Онтон мопед 50 кубтаах күүстээх мотуордаах. 16 сааһыттан ыытар көҥүллэнэр. «М» категория ирдэнэр. Харыстанар шлемы булгуччу кэтэн айанныахтаахтар.
Ааспыт сылга улахан киһи итирик туруктаах матасыыкыл ыыта сылдьан суол саахалыгар түбэһэн балыыһаҕа киирбитэ. Хомойуох иһин, 3 сыллааҕыта матасыыкыллаах оҕолор суолга улаханнык дэҥнэммиттэрэ. Биир оҕо эчэйбитэ, биир оҕо суорума суолламмыта. Онон төрөппүттэр оҕолоргутун матасыыкылга сааһын ситэ илигинэ олордумаҥ. Тутуллар түгэнигэр 12.7 ыстатыйа 1 чааһыгар КоАП РФ олоҕуран 5-15тыһ. солк. тиийэ ыстарааптанарын таһынан, төрөппүккэ матасыыкылы биэрбитин иһин 30 тыһ. солк. ыстараап ананар. Ону таһынан, 5.35 ыстатыйаҕа олоҕуран төрөппүт анал миэрэҕэ тардыллар, оҕону ПДН салаатынан учуокка туруораллар.
Халлаан сылыйан матасыыкыл ыытааччылар суолга таҕыстылар. Ол иһин, хас биирдии суол айанын кыттыылааҕа быраабыланы тутуһан айанныахтааҕын өйдүөх тустаах”.
“Внимание -дети!” операция биир ый устата барыаҕа. Манна сүрүн болҕомтону оҕолорго ууруохтара. Сайыҥҥы уһун сынньалаҥ иннинэ өйдөтүүгэ-сэрэтиигэ туһуламмыт операциялар ыытыллаллара үгэскэ кубулуйда. Суол инспектордара массыынаҕа оҕону сөпкө быраабыланы тутуһан олордон айаннаталларын, бэлэсэпиэтинэн сылдьар оҕолору хонтуруоллуохтара, өйдөтүү-сэрэтии үлэтин ыытыахтара.
Мира АФАНАСЬЕВА
Суолга «Мотоцикл», «Внимание-дети!» операциялар ыытылла тураллар
