Дойдуга Дьиэ кэргэн сылынан дьиэ кэргэни көҕүлүүр тэрээһиннэргэ кыттар улахан чиэс, бочуот.
Владивосток куоракка “Это у нас семейное” диэн дьиэ кэргэн күрэһигэр Уһук Илиннээҕи федеральнай уокурук сүүмэрдиир түһүмэҕэр 4853 ыалтан талыллан Сунтаартан Ивановтар дьиэ кэргэн кыттыыны ыллылар. Бу иннинэ Ивановтар куйаар ситиминэн араас сорудахтары толорбуттара. Онтон түмүгэр уопсайа 509 балл ылан, Владивосток куоракка полифиналга ыҥырыллан үөрүүлэрэ үгүс.
Ыал аҕа баһылыга Сергей Серафимович Сунтаардааҕы гимназияҕа ОБЖ учууталынан, ыал ийэтэ Анна Николаевна эмиэ гимназияҕа уруһуй учууталынан үлэлиир. 3 оҕолоохтор. Полуфиналга уопсайа 70 дьиэ кэргэн көрүстэ. Саха өрөспүүбүлүкэтиттэн бу күрэскэ 6 ыал кытынна. Сүрүнэ бу күрэскэ дьиэ кэргэн элбэх оҕолооҕо уонна үс көлүөнэ дьонтон туруохтааҕа ирдэнэр.
Владивосток куоракка көрсүбүт дьиэ кэргэттэр араас култууралаах, идэлээх, тыллаах дьон буоллулар. Ол эрэн, кинилэри иллээх-эйэлээх буолуу, биир тыыннах дьиэ кэргэн ситимниир.
Анна Иванова Владивосток куоракка сырыыларын туһунан бу курдук кэпсээтэ: “Куйаар ситиминэн күрэс биллэриллибитин истэн тутатына кыттарга соруммуппут. “Бииргэ ыллыахха”, “Дьиэ кэргэн гербэтэ”, “Волонтердарбыт”, “Машина времени” уо.д.а. интэриэһинэй ис хоһоонноох тургутуулары ааспыппыт. Владивосток куоракка айаммытын, түһэр сирбитин, аһылыкпытын барытын тэрийээччилэр уйуннулар. Олус көхтөөх дьиэ кэргэттэр мустубуттар. Олуһун үөрдүбүт, астынныбыт. Түһүмэхтэр барыта дьиэ кэргэни түмэр, холбуур ис хоһоонноохтор. Араас маастар кылаастар, лекциялар буоллулар. Биири да көтүппэккэ кытынныбыт. Хомойуох иһин аҕабыт бу кэмҥэ “Вахта памяти” диэн раскопкаҕа үлэлии сылдьар буолан Владивосток куоракка кыттыбата. Ол эрэн, биһигини кытта биһиги дьиэбит тутаах киһитэ эбэбит Люция Прокопьевна сырытта ”. Дьиэ кэргэни ситимнииргэ, көҕүлүүргэ маннык күрэстэр суолталара улахан.
Мира АФАНАСЬЕВА