Сунтаарбыт улууһугар урбаан эйгэтин биир улахан Нина Герасимова салайааччылаах “Татыйыына” тэрилтэтэ үүт аһылыгы оҥорор собуотун арыйар үөрүүлээх күнэ буолла. Сыахха үрүҥ ас арааһа, ол иһигэр сыыр, мороженай астанара былааннанар. Собуот бэйэтигэр лабораториялаах, манна ас хаачыстыбатын быһаарыахтара. Үс улууһу: Сунтаары, Мииринэйи, Ньурбаны хааччыйыаҕа. Кыамтата 5 туоннаҕа диэри.
Тэрээһин бэлиэ күҥҥэ ыҥырыылаах ыалдьыттар Үөһээ Бүлүүттэн аҕабыыт Михаил, Сунтаардааҕы таҥара дьиэтин салайааччыта Владимир, Нина Прокопьевна уонна кини дьүөгэтэ, үөлээннээҕэ Светлана кыттыылаах таҥараҕа махтаныы сулууспатыттан саҕаланна. Үөрүүлээх түгэнинэн СӨ тыа хаһаайыстыбатын уонна аска-үөлгэ бэлиитикэтин миниистирин солбуйааччы Сахаяна Павлова, Сунтаар улууһун баһылыгын 1-кы солбуйааччыта Николай Александров, Сунтаар нэһилиэгин баһылыга Эдуард Филиппов, фирманы кытта ыкса сибээстээхтик үлэлиир Аллыҥа нэһилиэгин баһылыга Николай Спиридонов, АЭБ Сунтаардааҕы филиалын салайааччыта Эллада Николаева, о.д.а. эҕэрдэ тылларын этэн, истиҥ бэлэхтэрин туттардылар. Үөрүүлээх быһыыга-майгыга кыһыл лиэнтэ быһыллан, ыалдьыттар собуот иһин көрөргө дьулустулар.
Саҥа собуот тигинэччи үлэлээн, улууспут, өрөспүүбүлүкэбит сайдыытыгар бэйэтин кылаатын киллэрэн үүнэ-сайда турарыгар баҕарабыт.
Олохтоох оҥорон таһаарар аспыт-үөлбүт иҥэмтиэлээх, амтанныын ураты, минньигэс буоллаҕа.
Алена ИВАНОВА