Бүгүн, кулун тутар 27 күнүгэр, Сунтаарга VIII төгүлүн ыытыллар норуоттар икки ардыларынааҕы «Азия оҕолоро» сайыҥҥы оонньууларын уотун эстафетатын сунтаардар уруйдуу-айхаллыы көрсөр долгутуулаах үөрүүлээх түгэннэрэ буолла.
«Азия оҕолоро» уотун Ленин болуоссатыттан факел уматан «Алмаз» стадиоҥҥа сүүрэн аҕаллылар.
Уот эстафетатын саҕалаата, Аан дойду, Европа хас да төгүллээх чөмпүйүөнэ биһиги киэн туттар киһибит Варвара Макарова-Сүүрүк Балбаара, оттон мас тардыһыытыгар Аан дойду чөмпүйүөнэ Ильдар Ушатов ытык уоту тутан эстафетаны түмүктээтэ.
Бу кэннэ «Алмаз» стадиоҥҥа Сунтаар улууһун баһылыгын социальнай боппуруостарга уонна имидж политикатыгар солбуйааччы Гаврил Еремеев улуус олохтоохторун бу үөрүүлээх тэрээһин буолбутунан эҕэрдэлээтэ. Оонньуу уотун уруйдаан мустубут дьон оһуохайдаатылар. Оонньуу уота салҕыы Мииринэй оройуонугар айанныа.
Дмитрий ЫМЫЧАНОВ