Олунньу 27-28 күннэригэр Сунтаар улууһугар оскуола иннинээҕи үөрэхтээһин тиһигэр — улуустааҕы профессиональнай «Сыл бастыҥ иитээччитэ — 2025» куоҥкурус үрдүк таһымҥа буолан ааста. Манна барыта улуус араас уһуйааннарыттан 8 педагог кытынна.
Куоҥкурус бастакы күнэ «Педагогическое мероприятие с детьми» диэн иккис түһүмэххэ ананна. Кыттааччылар бэйэлэрин үөрүйэхтэрин, сатабылларын араас саастаах оҕолорго сөп түбэһиннэрэн көрдөрдүлэр. Бастакы түһүмэх кэтэхтэн ыытыллыбыта. Онно бэйэлэрин визиткаларын, бырайыактарын билиһиннэрбиттэрэ. Кыттааччылар икки былаһаакканан күрэхтэстилэр: Сунтаар 5-с нүөмэрдээх «Ньургуһун» уонна 7-с нүөмэрдээх «Солнышко» оҕо сайдар киин иитиллээччилэригэр аһаҕас дьарыктар буоллулар. Педагогтар орто уонна бэлэмнэнии бөлөхтөргө саҥа билиини-көрүүнү биэрэн, умсугуйан үлэлээтилэр.
Куоҥкурус үөрүүлээх аһыллыытыгар үөрэх салалтатын салайааччыта Борис Васильев уонна оскуола иннинээҕи үөрэхтээһин отдел салайааччыта Мичийэ Михайлова эҕэрдэ тылларын эттилэр, кыттааччыларга ситиһиини, таһаарыылах үлэни баҕардылар.
Бастакы күн түмүгүнэн финалистары иһитиннэрдилэр. Ол кэннэ тута куоҥкурус үһүс түһүмэҕэ — маастар-кылаас көрдөрүүтэ саҕаланна. Лауреаттар бэйэлэрин ураты методикаларын көрдөрдүлэр, коллегаларын кытта уопуттарын үллэһиннилэр. Ол курдук, Сунтаар 7-с нүөмэрдээх «Ньургуһун» уһуйаан эбии үөрэхтээһин педагога Игнат Федоров оҕону тулуурдаах, түргэн-тарҕан буоларга үөрэтэр, сайыннарар «Байанай бэлэҕэ» диэн сүрдээх интэриэһинэй оонньуутун билиһиннэрдэ. Сунтаар 4-с нүөмэрдээх «Березка» уһуйаан иитээччитэ Антонина Колесова мнемотехника көмөтүнэн оҕо саҥарар саҥатын сайыннарыыга анаммыт үлэтин кэпсээтэ. 11-с нүөмэрдээх «Кыталык» оҕо сайдар киин эбии үөрэхтээһинин педагога Диана Корнилова дьарыгы хайдах интэриэһинэй гына ыытыахха сөбүн туһунан бэйэтин авторскай үлэтин уопутун үллэһиннэ.
Куоҥкурус иккис күнүгэр кэтэхтэн «Төрөппүттэргэ сэминээр» уонна «Профессиональнай кэпсэтии» ток-шоу түһүмэхтэр буоллулар. Кыттааччылар оскуола иннинээҕи үөрэхтээһин тирээн турар боппуруостарыгар дьүүллэстилэр, уопуттарын үллэһиннилэр уонна үөрэх тиһигин сайыннарыыга бэйэлэрин тус этиилэрин киллэрдилэр.
Ол кэннэ куоҥкурус үөрүүлээх сиэрэ-туома ыытылынна. Жюри кыайыылаахтар ааттарын билиһиннэрэн, анал өйдөбүнньүк бириистэринэн уонна дипломунан наҕараадалаата. Ол курдук, 3-с истиэпэннээх диплом ананна Күүкэй сэлиэнньэтин «Биһик» уһуйаан иитээччитигэр Виктория Прокопьеваҕа. 2-с истиэпэннээх диплом — Сунтаар 4-с нүөмэрдээх «Березка» уһуйаан иитээччитигэр Антонина Колесоваҕа, 1-кы истиэпэннээх диплом — Сунтаар 5-с нүөмэрдээх «Ньургуһун» уһуйаан эбии үөрэхтээһин педагогар Игнат Федоровка.
«СЫЛ БАСТЫҤ ИИТЭЭЧЧИТЭ — 2025» куоҥкурус муҥутуур кыайыылаҕынан Сунтаар 11-с нүөмэрдээх «Кыталык» оҕо сайдар киинин эбии үөрэхтээһин педагога Диана Корнилова.
Кыттааччылары ис сүрэхтэн эҕэрдэлиибит, Диана Афанасьевнаҕа улууһун аатын өрөспүүбүлүкэтээҕи күрэххэ көмүскүү барарыгар ситиһиини, кыайыыга дьулууру баҕарабыт!
Улуустааҕы күрэс Сунтаар улууһун оскуола иннинээҕи үөрэхтээһинин ситимигэр сүҥкэн суолталаах түгэн, бастыҥ педагогтары көҕүлээһиҥҥэ, уопут атастаһарга уонна сайдыы суолларын торумнуурга көдьүүстээх былаһаакка буолла.
Сунтаар улууһун үөрэҕириитин пресс-сулууспата