Быйылгы сылтан нэһилиэнньэ дарыктаах буолуутун хааччыйар СӨ судаарыстыбаннай кэмитиэтэ «Работающая Якутия. Кадры» диэн улахан бырайыагы оҥорон таһаарда. Бырайыак Ил Дархан Айсен Николаев дьадайыыны утары охсуһар ыйааҕар олоҕуран, итиэннэ нэһилиэнньэ дьарыктаах буолуутун ситиһэр уонна каадырынан хааччыйар сыаллаах үлэлиир. Бу күннэргэ Бүлүү бөлөх оройуоннарыгар СӨ судаарыстыбаннай кэмитиэтин оробуочай бөлөҕө үлэтин саҕалаата.
Бүгүн С.А.Зверев-Кыыл Уолун аатынан норуот айымньытын киинигэр нэһилиэнньэ дарыктаах буолуутун хааччыйар СӨ судаарыстыбаннай кэмитиэтин бэрэссэдээтэлэ Светлана Горюшинскаяны кытары көрсөн аһаҕас кэпсэтии буолла. Манна улуус баһылыга Анатолий Григорьев, нэһилиэк баһылыктара, улуус дьокутааттара, тэрилтэ салайааччылара уонна урбаанньыттар кыттыыны ыллылар. Көрсүһүүгэ Анатолий Васильевич Сунтаар улууһугар үлэнэн хааччыллыы боппуруоһа хайдах барарын, туох үлэ ыытылларын итиэннэ дьарыктаах буолуу киин Сунтаардааҕы салаатын кытары ситимнээхтик үлэлииллэрин эттэ.
Салгыы Светлана Горюшинская бэйэтин хамаандатын кытары Сунтаар улууһугар кэлэн, олохтоох дьон туох, хайдах олороллорун чугастык билсэн, инникитин сибээс олохтоноругар олус туһалааҕын ыйда. Маны этэн туран дойду, эрэгийиэн таһымыгар турар сытыы боппуруоһу, үлэ миэстэтин, каадырынан хааччыллыы туһунан элбэҕи кэпсээтэ. Быйылгы сылтан 2030 сылга диэри «Кадры» саҥа национальнай бырайыак үлэтин саҕалаата. Бу бырайыак иитинэн 4 сүрүн хайысханан «Управление рынком труда», «Образование для рынка труда», “Активные меры содействия занятости”, “Человек труда” федеральнай бырайыактар баар буоллулар – диэн эттэ. Аһаҕас кэпсэтиигэ нэһилиэк баһылыктара анал байыаннай дьайыы кыттыылаахтарын үлэнэн хааччыйыыга олус интэриэһинэй, тирээн турар сытыы боппуруостары көтөхтүлэр.
Көрсүһүү кэмигэр Сунтаардааҕы дьарыктаах буолуу киинин салайааччыта Борис Уларов санаатын үллэстэр.
-
Биһиги улуус, нэһилиэк баһылыктарын, биирдиилээн тэрилтэ салайааччыларын кытта тэҥҥэ, биир сүбэнэн ылсан үлэлэһэрбит кэрэхсэбиллээх. Былырыын биһиэхэ 300-тэн тахса үлэ көрдөнөөччү учуокка турбута. Олортон 200-тэн тахса киһини үлэҕэ киллэрдибит. Ирдэбил быһыытынан 565 №-дээх ФЗ олоҕуран үлэ биэрээччи үлэ миэстэтэ таҕыста да “Работа в России” платформаҕа биллэриэхтээх.
Салгыы «Татыйыына» уонна «Сунтарцеолит» улуус биир бөдөҥ тэрилтэлэрин кытта «Работающая Якутия. Кадры» бырайыакка бииргэ үлэлэһэр курдук үс өрүттээх сөбүлэҥ баттастылар. Маны тэҥэ, “Сунтаравтодор» генеральнай дириэктэригэр Дмитрий Теҥҥэ, И.С. Иванов аатынан Сунтаар 2-с №-дээх оскуола дириэктэригэр Василий Ивановка, Күүкэй нэһилиэгин баһылыгар Юрий Прокопьевка нэһилиэнньэ дарыктаах буолуутун хааччыйар СӨ судаарыстыбаннай кэмитиэт Махтал суруктарын туттардылар.
Елизавета ТИТОВА