Бүгүн үҥкүү дьоро күнэ тосхойдо. Сунтаарбыт нэһилиэгин баһылыгын кубогын иһин тэрилтэлэр холбоһуктаах хамаандаларын икки ардыларыгар ыытыллар VI спартакиадатын чэрчитинэн уонна култуура салалтатын көҕүлээһининэн, С.А. Зверев-Кыыл Уола туруорбут «Оһуор» үҥкүүтүн күрэһэ ыытылынна. Бары билэрбит курдук, сүдү киһибит Сергей Зверев саха үҥкүүтүн култууратын төрүттээччи буолар. Саха норуотун үҥкүүтүгэр үтүө холобур буолбут 30-тан тахса үҥкүүнү айбыта. Олортон биирдэстэрэ дириҥ ис хоһоонноох, саха киһитин олоҕун хас биирдии хамсаныытын кэпсиир суолталаах, ылбычча эрэ киһи үҥкүүлээбэт «Оһуор” үҥкүүтэ буолар.
Бу киэһэ Сунтаар нэһилиэгин 8 холбоһуктаах тэрилтэтин эр дьоно уонна кэрэ аҥардара илии-илииттэн сиэттиһэн киирэн, үҥкүүнү оройуттан туттулар. Манна араас идэлээх педагогтар, баһаарынайдар, быраастар о.д.а. кытыннылар. Кинилэр дьиэттэн, үлэттэн быыс булан, үҥкүү кэрэ эйгэтигэр кыттан дьоро күнү бэлэх ууннулар. Кыттааччылар биир киһи курдук тэбис-тэҥҥэ, таҥас-сап маанытын симэнэн, олус бэркэ бэлэмнэнэн, көрөөччү дохсун ытыһын тыаһыгар доҕуһуолатан, көрүөхтэн эрэ кэрэтик үҥкүүлээтилэр. Күрэс түмүгүнэн, кыайыылаах үрдүк аатын «Кыталык» оҕо сайдар киинэ, кииннэммит бухгалтерия уонна МЧС холбоһуктаах тэрилтэлэрэ, 2 миэстэ — Сунтаардааҕы киин балыыһа тэрилтэтэ, 3 миэстэ — «Ньургуһун» оҕо сайдар киинэ уонна ОДЬКХ холбоһуктаах тэрилтэлэрэ буолла.
Үҥкүүнү таптааҥ, үҥкүүгэ сүгүрүйүҥ!
Алена ИВАНОВА
