Бүгүн, сэтинньи 11 күнүгэр, Сунтаарбыт улууһугар Хабылык күнэ бэлиэтэнэр. Сунтаар улууһун баһылыга Анатолий Григорьев 2021 сыл 326№-дээх уурааҕынан сэтинньи 11 күнүгэр олохтоммута.
Өбүгэлэрбит былыр-былыргыттан уһун унньуктаах, тымныы кыһыны көмүлүөк оһох иннигэр, остуол тула олорон араас оонньуу тэрийэн күнү-дьылы билбэккэ аһардаллара. Хабылык оонньуур киһи илиитэ имигэс буолар, өйө-санаата уонна туттара-хаптара эмиэ түргээтиир.
Бу күнү көрсө Сунтаар улууһун оскуолаларга, уһуйааннарга, түөлбэлэргэ, тэрилтэлэргэ араас күрэхтэһиилэр ыытылыннылар.
«Көхтөөхтүк кыттар уонна дьону успуорт бу көрүҥэр көҕүлүүр бары иитээччилэргэ, учууталларга, түөлбэ салайаачыларыгар, нэһилиэк баһылыктарыгар барҕа махталбытын тириэрдэбит. Өбүгэбит оонньууларын сэргиир, оонньуон баҕарар киһи ахсаана сыл аайы эбиллэн иһэрэ биһигини олус үөрдэр», — диэн Сунтаар улууһун остуол оонньууларын Федерациятын салайааччыта Мария Васильева эттэ.
Өбүгэлэрбит төрүт оонньууларын харыстаан, тарҕатан уонна оонньуу нөҥүө норуот духуобунай култууратыгар дьону көҕүлүүр тоҕоостоох.
Дмитрий ЫМЫЧАНОВ