Арассыыйаҕа нэһилиэнньэ ахсаанын элбэтиигэ дойду бэрэсидьиэнэ Владимир Путин олохтообут «Демография» национальнай бырайыага төһүү күүс буолар.
Улууспутугар биэс ый түмүгүнэн 82 оҕо күн сирин көрдө. Оттон ыам ыйыгар улуустааҕы ГТАС-ка 24 оҕо төрөөбүтүн туһунан регистрацияламмытын ГТАС салайааччыта Анна Григорьева иһитиннэрдэ. Манна даҕатан эттэххэ, өрөспүүбүлүкэбит киин куоратыгар перинатальнай киин үлэҕэ киирэн, билигин төрүүр ийэ уонна оҕо чэгиэн доруобуйалаах, оҕо өлөөһүнүн аччатыыга туһуламмыт хамсааһынынан Дьокуускай куоракка баран төрүүллэр. Оҕону ким ханна регистрациялатарын төрөппүт бэйэтэ быһаарар. Онон бу көрдөрүү араастаһыан сөп эбит.
Бу күннэргэ улууспут балыыһатыгар Кира Борисова кыыс оҕолонон, дьиэлэригэр таҕыстылар. Кира, Игорь Борисовтар бу үһүс оҕолоро. Инники кыыстаах уол оҕолоохтор. Онон улууспутугар элбэх оҕолоохтор элбээн иһэллэр. Саҥа кыысчааҥҥа Алиса диэн аат биэрбиттэр. Кира — Сунтаар олохтооҕо, Игорь — Наахараттан төрүттээх. Элбэх оҕолоох ыал Сунтаарга олохсуйан олорор.
Өрөспүүбүлүкэ Ил Дархана Айсен Николаев өссө 2022 сыллаахха Саха сирэ 100 сылынан саҥа төрөөбүт оҕолорго «Дети 100-летие» диэн харчынан өйөбүл оҥоһулларын олохтообута. Борисовтар бу сэртипикээти иккис оҕолоругар ылбыттара. Ол сэртипикээттэрин дьиэ кэргэҥҥэ оҕо улаатарыгар, сайдарыгар, кинилэргэ сөптөөх усулуобуйаны олохтуурга туһаммыттара. Элбэх оҕолоох Борисовтар судаарыстыба өттүттэн маннык көмө баара олус өйөбүллээх диэн бэлиэтииллэр.
Яина ВЛАСЬЕВА