Бүгүн Сунтаардааҕы 1№-дээх оскуолаҕа “Сүрэхпин оҕолорго аныыбын” диэн эбии үөрэхтээһин педагогтарыгар күрэс улуустааҕы сүүмэрдиир түһүмэҕэ ыытылынна. Күрэскэ 7 уһуйааччы Элгээйиттэн, Кутанаттан, Уһун Күөлтэн уонна Сунтаартан кыттыыны ыллылар. Кыттааччылар бэйэлэрин билиһиннэрдилэр, оҕолорго маастар-кылаастары ыыттылар, тургутук аастылар уонна тус олохторугар, үлэлэригэр сыһыаннаах дебакка кытыннылар. Хас биирдии педагог маастар-кылааһын уратытык, интэриэһинэйдик уонна үлэтигэр туох саҥа сүүрээни туттарын дьүүллүүр сүбэҕэ көрдөрдө.
Н.М.Родионова аатынан оҕо дьоҕурун сайыннарар киин уһуйааччыта Вера Зоммер оҕолору кытта ыкса чугастык үлэлээбитэ 4 сыла. Кини бүгүн “Тыйаатыр уонна киинэ” диэн маастар-кылааска оҕолору кытыннарда. Бары таптыыр сөбүлүүр геройбут Чебурашка 55 сылын туолбутугар маастар-кылааһын анаата. Оҕолору хара маҥнайгыттан оонньоһон, интэриэстэрин тардан, маастар-кылааһа бэрт сэргэхтик ааста. Ол курдук, оҕолор маастар-кылааска киинэни саҥартылар (озвучка), киинэ хайдах таҥылларын, оҥоһулларын уопсай өйдөбүлүн биллилэр. Онтон атын уһуйааччылар ырыаҕа, түмэлгэ экскурсия, уруһуйга, доруобуйаларынан хааччахтаах оҕолорго сөптөөх уо.д.а. ураты ис хоһоонноох маастар-кылаастары ыыттылар.
Үлэтигэр айымньылаахтык сыһыаннаһар, ураты ньыманы туттар, оҕолор интэриэстэрин тардар эбии үөрэхтээһин бастыҥ педагогунан, күрэс кылаан кыайыылааҕынан Сунтаардааҕы коррекционнай оскуола уһуйааччыта Ньургуйаана Данилова буолла. Уус-уран (художественнай) хайысхаҕа 1үрдэл Вера Зоммер, 2 үрдэл Октябрина Афанасьева, 3 үрдэл Фатина Иванова, естественнэй-научнай үөрэхтээһин хайысхатыгар 1 үрдэл Мария Еремеева, 2 үрдэл Ньургустаана Иванова, «Дебют» хайысхаҕа 1 үрдэл Сайаана Васильева буоллулар. Кыайыылаахтар салгыы Дьокуускай куоракка өрөспүүбүлүкэтээҕи күрэскэ кытта айанныахтара.
Мира АФАНАСЬЕВА