Бүгүн күн иккис аҥарыгар СӨ Үп миниистирин эбээһинэһин толорооччу Иван Алексеев салайааччылаах отчуоттуур бөлөх Хоро, Элгээйи нэһилиэктэринэн сылдьан үлэтин саҕалаата. Иван Иванович салайар бөлөҕөр СӨ Гражданскай оборона уонна нэһилиэнньэҕэ куттал суох буолуутун хааччыйыы дьыалаларыгар миниистири солбуйааччы Никита Павлов, СӨ үлэҕэ уонна социальнай сайдыыга миниистирин солбуйааччы Иннокентий Коротких, СӨ Үөрэхтээһиҥҥэ уонна наукаҕа министиэристибэтин уопсай үөрэҕирии, иитии уонна эбии үөрэхтээһин эйгэтигэр судаарыстыбаннай бэлиитикэҕэ Департаменын салайааччытын солбуйааччы Марфа Корякина, “Мин биисинэһим” киин генеральнай дириэктэрэ Зоя Седалищева, Ил-Түмэн дьокутаата Афанасий Постников, Сунтаар улууһун баһылыгын экономическэй сайдыыга уонна стратегическэй былааннааһыҥҥа солбуйааччы Борис Васильев уонна улуус тэрилтэлэрин тустаах үлэһиттэрэ кыттыыны ыллылар.
Отчуоттуур бөлөх бастакынан улуус кииниттэн 68 км тэйиччи сытар Хоро нэһилиэгэр үлэни ыытта. Отчуот саҕаланыыта нэһилиэк 10 оҕолоох дьоруой ийэтэ Варвара Ивановна дьиэтэ эргэ, кыараҕас буолан манна туох-хайдах көмө баарын тус көрсүһүүгэ ыйытта. Бу боппуруоска СӨ үлэҕэ уонна социальнай сайдыыга миниистирин солбуйааччы Иннокентий Коротких туох көмө көрүллүөн сөбүн, эрдэ көрүллүбүт көмө өрүтүн бары өттүнэн үөрэтэн, үлэлэһиэх буолла. Санатан эттэххэ, Варвара Ивановна ити боппуруоһун улуус дьаһалтатын отчуотугар эмиэ туруорбута. Олохтоох дьон сүрүн туруорсар боппуруостара муоста тутуута, иһэр ууларыгар муус уута хаачыстыбата мөлтөҕүнэн уу ыраастыыр станция баара буоллар, уматык сыанатыгар, ону тэҥэ доруобуйа харыстабылыгар диализ ыарыынан ыалдьар дьон Ньурба улууһугар баран көрдөрүнэллэрэ ыарахаттардааҕынан, улуус киинигэр баар буолара буоллар диэн туруорсаллар. Ону тэҥэ, доруобуйаларынан хааччахтаах дьон МСЭК баралларыгар дөкүмүөн толорторорго уустуктардааҕын эттилэр. Маныаха Сунтаардааҕы киин балыыһа кылаабынай бырааһын солбуйааччы Марианна Корнилова, билигин дөкүмүөн барыта электронно барар диэтэ. Маны таһынан ФАП дьиэтэ тымныытынан, ититии ситимэ уоттан холбонон турар буолан кыайбатын, киин ититиигэ холбонуохтарын эттилэр.
Нэһилиэнньэни кытта көрсүһүүгэ элбэх киһи көхтөөх кыттыыны ылла, итиэннэ СӨ ситэриилээх былааһын отчуотун биһирииллэрин биллэрдилэр. Баар кыһалҕаларга, ыйытыктарга сөптөөх хоруйу ылан тарҕастылар.
Хоро нэһилиэгиттэн отчуоттуур бөлөх салгыы Бүлүү Эбэ уҥа кытылыгар сытар, улуус биир саамай улахан нэһилиэгэр – Элгээйигэ кэллэ. Нэһилиэнньэтин ахсаана билигин 1700 кэриҥэ киһи баар. Олохтоох дьон маҥнай утаа Б.Н. Андреев аатынан Элгээйитээҕи Айылҕа түмэлигэр сырытыннардылар. Санатан эттэххэ, былырыыҥҥы отчуокка түмэл дьиэтин тутуутугар үбүнэн-харчынан көмөҕө боппуруос көтөхпүттэрэ эрээри, ити кыаллыбатаҕа.
Элгээйигэ олохтоохтору кытары көрсүһүүгэ оробуочай бөлөх ыытыллыбыт үлэни, итиэннэ инники соруктары кэпсээтилэр. Сүрүн дакылааты СӨ Үп миниистирин эбээһинэһин толорооччу Иван Иванович Алексеев оҥордо. Олохтоохтору долгутар боппуруостарга тохтоон ааста. Салгыы мунньахха кэлбит дьон мунаахсыйар, ситэ кыалла илик боппуруостарга бэйэлэрин ыйытыыларын биэрдилэр. Ол курдук, уһуйаан сэбиэдиссэйэ Марина Харитонова, билигин үс дьиэнэн сүүрэ сылдьан үлэлииллэрин эттэ. Нэһилиэккэ 90 миэстэлээх уһуйаан тутуутун былаана ханна тиийбитин туоһуласта. Тыа сиригэр олорор дьон биир үксүн тыа хаһаайыстыбатынан дьарыктанан, үлэлээх-хамнастаах олордохпут. Онон, бу да салааҕа олохтоохтортон үгүс ыйытыы киирдэ. Маны сэргэ, бэтэринээрдэргэ «Земский учитель», «Земский доктор» курдук бырагыраама баара буоллар диэн этии киллэрдилэр уонна бэтэринээр хамнаһа үрдүүрэ буоллар диэн туруорсаллар. Олохтоохтор үрдүкү судаарыстыбаннай уорганнарын ситэриилээх былааһын үлэһиттэрин кытары утарыта көрсөн, олус элбэх долгутар боппуруостары эт куоластарынан да, суругунан да киллэрэн туруордулар. Ол курдук иһэр уу, уматык, уот төлөбүрүн сыанатыгар, анал байыаннай дьайыы кыттыылаахтарыгар көрүллэр көмөнү о.д.а. биэрдилэр.
Түмүккэ, СӨ Үп миниистирин эбээһинэһин толорооччу Иван Иванович Алексеев министиэристибэ наҕараадаларын оскуола дириэктэрин иитэр үлэҕэ солбуйааччы Вячеслав Сафоновка «Надежда Якутии» түөскэ кэтиллэр бэлиэни, итиэннэ тутуу эйгэтигэр үтүө суобастаахтык үлэлээбитин уонна сайдыыга кылаатын иһин Андрей Варламовка Бочуотунай грамотаны туттарда.
Елизавета ТИТОВА