Сунтаар эт-сиин өттүнэн сайдыылаах буолууга, чөл-чэбдик олоҕу тарҕатыыга, успуорду өрө тутар улуустартан биирдэстэрэ буолар. Маны барытын успуорт эйгэтигэр улуус ситиһиилэрэ туоһулуур. Ол иһин да буолуо, Бүлүү бөлөх улуустарыгар биир бастакынан баараҕай, эт-сиин чэбдигирэр саалалардаах бассейннаах успуорт комплексы тутан үлэҕэ киллэрдэ.
Тэрээһин үөрүүлээх аһыллыытыгар Саха сирин Бырабыыталыстыбатын бэрэссэдээтэлин солбуйааччы Сергей Местников ыалдьыттаата. Кини маннык успуорт эбийиэктэрэ тыа сирин сайдыытыгар улахан суолталаахтарын бэлиэтээтэ:
«Тыа сирин сайдыытыгар тоҕоостоох усулуобуйа тэриллиэхтээх. Тыа хаһаайыстыбата, үөрэх, култуура, успуорт эйгэтэ биир кэлимник сайдыахтаах. Ол иһин, «Байҕал» диэн ааттаах успуорт комплекса элбэх ыччат дьон тыа сиригэр олохсуйарыгар, оҕолор эт-хаан өттүнэн сайдыылаах буолууларыгар ананыаҕа».
Бассейн тутуута “Тыа сирин биир кэлим сайыннарыы” федеральнай тосхолунан тутуллунна. Сунтаар улууһун баһылыга Анатолий Григорьев улуус киинигэр маннык баараҕай, аныгы тутуулаах спортивнай эбийиэк киирбитинэн бар дьонун эҕэрдэлээтэ, үөрүүтүн үллэһиннэ:
«Бүгүн сунтаардарга историческай түгэн тосхойдо. Өр көһүппүт «Байҕал» аныгы оҥоһуулаах успуорт комплекспыт киирбититтэн бэйэм олуһун долгуйдум, үөрдүм. Бары көрө, истэ билэ сылдьарбыт курдук бу баараҕай тутуубутугар кэккэ ыарахаттары көрсүбүппүт. Ол эрэн, бырабыыталыстыбабыт, бар дьоммут өйөбүлүнэн үлэҕэ киллэрдибит».
Сунтаардар өр кэтэһиилээх тутууларын “Тутуу-Саха” (сал. Саввин Нь.В.) тэрилтэ ыытта. 3 этээстээх спортивнай комплекс 140 миэстэҕэ көрөөччү саалалаах. Ону тэҥэ, 25 миэтэрэ усталаах 6 харбыыр балаһалаах, тренажернай дьарыктанар сирдээх, буфеттаах, медицинскэй үлэһит, тириэньэрдэр хосторо уонна бассейн уутун ыраастыыр тиэхиничэскэй анал хостордоох.
Бассейны тыа сиригэр табыгастаах буоллун диэн инженернэй-техническэй ситимин табан оҥорбуттар. Саха мындыр толкуйа бассейн уустук ситимин оҥорууга көһүннэ. «Тутуу Саха» тэрилтэ сүрүн инженерэ Михаил Прокопьев маннык кэпсиир: «Бассейн уута бэйэтэ ыраастанар, сылыттар тэриллэрдээх. Уопсайа бассейыҥҥа 420 кубометр уу киирэр. Уустук, анал тэриллэри Арассыыйаҕа оҥоһуллар собуоттартан уонна омук сириттэн аҕалан туруордубут. Барыта аныгы, ирдэбилгэ эппиэттиир, хаачыстыбалаах тиэхиньикэ турда.»
Нэһилиэнньэҕэ анаан бассейн аанын сотору кэминэн тэлэччи аһыаҕа. Биир симиэнэҕэ 42 харбыыһыт дьарыктаныан сөп. Оскуола оҕолорун уонна нэһилиэктэртэн киирэн дьарыктанааччылары анал идэлээх дьон сөтүөлүүргэ үөрэтиэхтэрэ.
Бу күн номнуо оҕолор сөтүөлээтилэр. Аны, сотору кэминэн Сунтаар спортсменнара харбааһын көрүҥүгэр ситиһиилэнэллэрин сэмээр күүтэбит.
Мира АФАНАСЬЕВА
