Бэҕэһээ, олунньу 6 күнүгэр, Сунтаар нэһилиэгин баһылыга Эдуард Филиппов уонна дьаһалта сүрүннүүр исписэлииһэ Валентина Хастырова Сунтарскай переулок 1а тутулла турар дьиэ төһө бэлэмин, тутуутун хаачыстыбатын билистилэр. Тутааччы «ДабанСтрой» ХЭТ дириэктэрин солбуйааччы Альберт Игнатьев уонна тутуу начальнига Борис Герасимов үлэ хаамыытын көрдөрдүлэр уонна кэпсээтилэр.
Дьиэ иһин-таһын үлэтэ олунньу ый бүтүүтүгэр түмүктэнэрэ былааннанар. Онон сотору кэминэн 23 ыал саҥа дьиэҕэ киирэллэрэ күүтүллэр.
Нэһилиэк баһылыга Эдуард Филиппов: «РФ бэрэсидьиэнэ Владимир Путин көҕүлүүр «Жилье и городская среда» национальнай бырайыак чэрчитинэн, «Хаарбах уонна саахалланар туруктаах дьиэлэртэн дьону көһөрүү» өрөспүүбүлүкэтээҕи аадырыстаммыт бырагырааманан 5 этээстээх, 71 кыбартыыралаах, толору хааччыллыылаах таас дьиэ бастакы уочарата (23 кыбартыыра, 3-с подьезд) түмүктэнэн эрэр. Ол кэннэ салгыы иккис уочаратын (48 кыбартыыра, 1-с уонна 2-с подъезд тутуутун) «ДабанСтрой» ХЭТ тутан бүтэриэ.
Ону таһынан, бу сыл саҕаланыытыгар «Главстройкомплекс» ХЭТ (дириэктэр Исаев А.Э.) «Кыайыы 75 сыла» кыбартаалыгар, Партизанскай уулуссаҕа 86 кыбартыыралаах, 3 подъездаах таас дьиэ тутуутун саҕалаатылар».
Георгий АФАНАСЬЕВ