Бүгүн тохсунньу 27 күнэ — Арассыыйа уонна ДНР Дьоруойа, Сунтаардааҕы технологическай колледж выпускнига Дмитрий Егоров төрөөбүтэ 50 сыла.
Бу күн колледжка сарсыарда 8.30 чаастан хас биирдии бөлөххө Аҕа дойду көмүскээччилэрин сылыгар уонна Дьоруой Дмитрий Николаевичка аналлаах кылаас чаастара ыытыллыннылар. Ол кэннэ эдэр көлүөнэ ыччат төрөөбүт дойдуларын көҥүлүн уонна кэскилин туһугар турууласпыт биир дойдулаахтарбыт ааттарын өйдүү-саныы сылдьалларыгар туһуламмыт линейка буолла. Линейканы Татьяна Федорова, иитиигэ дириэктэр сүбэһитэ, иилээн-саҕалаан ыытта. Кини колледж выпускниктарын, дьоруойдар Дмитрий Егоров уонна Филипп Евсеев туһунан кэпсээтэ.
Колледж дириэктэрэ Гаврил Михайлов илии баттааһыннаах Дьоруой Дмитрий Егоров аатын Сунтаардааҕы технологическай колледж байыаннай-патриотическай кулуубугар иҥэрэр туһунан бигэргэтэр бирикээһин ааҕан иһиттиннэрдэ. Туоһу суругу кулууп командирыгар Вадим Тихоновка туттарда.
Дмитрий Егоров аҕата Николай Егоров оҕолорго анаан, ыраахтан олорон ыыппыт видео устууга санаатын иһиттилэр.
ИСиП бөлөх устудьуоннара Дьоруойга аналлаах Чэлгийээнэ суруйбут хоһоонун ааҕан иһитиннэрдилэр. «Өйдөбүнньүк» кулууп кыттыылааҕа, МДСМ бөлөх устудьуона Оргуо Айаан Дмитрий Егоров бойобуой сырыыларын туһунан тыл эттэ. Дириэктэри иитэр үлэҕэ солбуйааччы Марфа Семенова патриотическай иитии туһунан дакылаат оҥордо.
Линейка түмүгэр Дьоруой кэриэһигэр анаан биир мүнүүтэ чуумпуруу билэриллиннэ.
Дмитрий Егоров аатын үйэтитиигэ дьиэ-кэргэнэ, төрөөбүт нэһилиэгэ, улууһа уонна Сунтаардааҕы колледж улахан болҕомтолорун уураллар.
Альбина МИХАЙЛОВА