Доруобуйаларынан хааччахтаах дьон дэкээдэлэрин иитинэн, бу күннэргэ улууспутугар араас хайысхалаах тэрээһиннэр тиһигин быспакка ыытылла тураллар.
Бүгүн, Сунтаардааҕы социальнай харалта управлениетын үлэһиттэрэ «Сытар ыарыһахтары, кырдьаҕастары көрүү-истии» диэн тиэмэлээх сэминээри тэрийэн ыыттылар. Сэминээр практическай чааһа Сунтаардааҕы технологическэй колледж аактабай саалатыгар буолла. Манна, ыаллыы сытар Ньурба улууһуттан В.А. Петрова аатынан Ньурбатааҕы кырдьаҕастар уонна инбэлииттэр дьиэлэрин үлэһиттэрэ кэлэн кыттыыны ыллылар. Ол курдук, ыстаарсай медиссиинискэй сиэстэрэ Татьяна Андреева, массажка медиссиинискэй сиэстэрэ Айталина Николаева, медиссиинискэй сиэстэрэ Василина Федорова сытар ыарыһаҕы көрүүгэ-истиигэ бэйэлэрин уопуттарыттан олус туһалаах сүбэлэри биэрдилэр, ону тэҥэ хайдах харайарга араас албастары, сөптөөх ньымалары көрдөрдүлэр. Практика өттүгэр үлэлэһэ сылдьар үлэһиттэри сэргэ, социальнай харалта управлениетын сэбиэдиссэйэ Мария Петрова теория өттүгэр ылбыт бэйэтин билиитин үллэһиннэ. Кырдьыга да, харайыыга наадыйар дьону көрөр-истэр олус ыарахан үлэ. Киһи барыта ылбычча сатаан ылсыбат, тулуйан үлэлээбэт үлэтэ диэххэ сөп. Бэйэтигэр бүгэн муунтуйбут дьону, ордук сааһыран деменциялаабыт кырдьаҕастары кытта кэпсэтэр олус уустук. Маныаха, идэлэрин баһылаабыт, анал үөрэхтээх дьон маннык хайысхалаах үлэни, сэминээрдэри, үөрэхтэри ыытан дьоҥҥо-сэргэҕэ баай уоппуттарын үллэстэллэрэ олус наадалаах. Сэминээргэ кыаммат кырдьаҕастары, инбэлииттэри көрөр-истэр дьоннор кэлэн бэйэлэригэр олус туһалаах сүбэлэри иһиттилэр, мунаахсыйар боппуруостарыгар хоруй ыллылар.
Түмүккэ, Сунтаардааҕы социальнай харалта управлениетын начальнига Михаил Тимофеев Ньурбатааҕы кырдьаҕастар уонна инбэлииттэр дьиэлэрин үлэһиттэригэр махталын биллэрдэ.
Елизавета ТИТОВА