Бүгүн Сунтаардааҕы технологическай колледжка Арассыыйаҕа Педагог уонна аҕа сүбэһит сылыгар анаммыт бэлиэ түгэн буолан ааста. Ол курдук колледжка саҥа биэлсэр отделениета арылынна.
Маны олоххо киллэрэр туһунан эрдэ түөрт өрүттээх дуогабарга (СТК, улуус дьаһалтата, киин балыыһа, Нерюнгритааҕы медколледж) илии баттаспыттара. Бүгүҥҥүттэн 35 устудьуон (ол иһигэр 5 уол) биэлсэр үөрэҕэр 2 сыл 10 ый устата үөрэнэн дипломнарын ылыахтара.
Үөрүүлээх тэрээһиҥҥэ устудьуоннары улуус баһылыга Анатолий Григорьев, колледж директора Гаврил Михайлов, СӨ үөрэҕин министерствотыттан педагогическай наука кандидата Надежда Григорьева, Нерюнгритааҕы медицина колледжын профессиональнай үөрэхтээһин сүрүн бырагыраамаларын үөрэтиигэ отделениетын сэбиэдиссэйэ Екатерина Митина, Ил Түмэн дьокутаата Андрей Николаев, улуус кылаабынай бырааһа Анатолий Назаров, доруобуйа харыстабылын бэтэрээнэ, Арассыыйа үтүөлээх бырааһа, үлэ бэтэрээнэ Иван Попов уо.д.а. эҕэрдэлээн тыл эттилэр. Устудьуоннар куратордарынан уопуттаах педагог Вероника Лыткина ананна.
Колледжка устудьуоннарга анаан туһунан үөрэнэр кабинет анаабыттар. Кабинет үөрэнэргэ аналлаах анатомическай пособиелардаах. Түмүккэ оҕолорго туһаайан Екатерина Митина: «Мантан инньэ эһиги биһиги көмүскэлбитигэр, көрүүбүтүгэр бааргыт. Онон эһиги өттүгүтүттэн үөрэххитигэр эппиэтинэстээх сыһыаны педкэлэктиип өттүттэн кэтэһэбит», — диэтэ.
Гаврил АНДРЕЕВ.
Дмитрий ПЕТРОВ хаартыскаҕа түһэриитэ, видеоҕа устуута.