Бүгүн, «Албан аат» болуоссатыгар үөрэх дьыла саҕаламмытынан Сунтаардааҕы ис дьыала отделын үлэһиттэрэ оҕолорго полиция идэтин туһунан билиһиннэрэр сыаллаах “Профориентир-2024” тэрээһини тэрийдилэр. Манна туттар тиэхиньикэлэрин, тэриллэрин көрдөрүүгэ аҕаллылар. Оҕолор полиция массыыналарыгар олорон тыас-уус таһааран, автоматы, пистолеты уо.д.а тэриллэри чугастык тутан-хабан көрдүлэр. Ордук уолаттар күннээтилэр, кыргаттар да хаалсыбатылар.
“Чебурашка” уһуйаан оҕолоро суолга сэрэхтээх буолуу оонньуутугар киэн билиилэрин көрдөрдүлэр. Оҕолор бары кэриэтэ хараҥаҕа тыгар сэлиэттээхтэрин ДПС инспектора көрөн хайҕаата, кырачаан пешеходтарга минньигэс кэмпиэттэри түҥэтэлээтэ. Онон бүгүн кытаанах көрүҥнээх полиция үлэһитэ сымнаан, оҕолору кытта тэҥҥэ оонньоото, үөрдэ-көттө.
Ол эрэн, үлэлэрин умнубатылар. Оҕолорго МВД үөрэхтэрин, түөкүттэртэн сэрэхтээх буолуу, оҕо буруйун кэһиитин сэрэтэр кэпсэтиилэри ыыттылар.
Айсен Павлов Сунтаардааҕы технологическай колледж устудьуона олус интэриэстээхтик сылдьан барытын көрдө-иһиттэ: “Мин оҕо сааспыттан полиция идэтин сэргиибин. Аармыйаҕа барарбын күүтэ сылдьабын. Ол кэнниттэн полицияҕа үлэҕэ киирэр санаалаахпын. Бүгүҥҥү тэрээһини олус астынным. Саамай сэргээбитим полиция туттар тэрилин тутан-хабан көрдүм, үлэһиттэри кытта илэ кэпсэтиэххэ сөп. Полиция үлэһитэ муус доруобай, элбэх билиилээх уонна киһи быһыытынан кытаанах, тулуурдаах буолуохтаах. Онон мин бу хаачыстыбаларбын сайыннарыыга кыһаллыам”. Оҕолор үөрбүт-көппүт, мичилийбит харахтарыттан көрдөххө тэрээһини сэргээбиттэр, сорохтор инники идэлэрин полиция үлэтин кытта ситимниир санаалаахтарын эттилэр.
Мира АФАНАСЬЕВА
