Сунтаардаҕы турнирга — Уус Алдан кэскиллээх мадьыныта

Олунньу 16-18 күннэригэр Сунтаар улууһун Элгээйи нэһилиэгэр 25-с төгүлүн ыытыллыбыт Николаев Виктор Макарович-Хотой Бииктэр бирииһигэр өрөспүүбүлүкэтээҕи мас тардыһыы аһаҕас турнирыгар уопсайа 152 кыттааччы 11 араас улуустан муһунна. Арай күрэхтэһии үөрүүлээх арыллыытыгар спортсменнар парадтара киирбитигэр көрбүппүт Уус Алдан улууһуттан биир соҕотох кыттааччы кэлбит эбит. Биир дойдулаахпытын кытта тута билсэн кэпсэттибит: 10-с кылаас үөрэнээччитэ Бурцев Айаал диэн бөҕө-таҕа көрүҥнээх, 80 киилэҕэ кытта кэлбит мадьыны эбит. Оҕобутугар күүс-көмө, өйөбүл буолаары “Сунтаар уус алданнара” түмсүү сүбэлэһэммит, 10000 солк. уу харчынан уонна Дима Винокуров диэн талааннаах уолбут, Элгээйи күтүөтэ, мэтээллэрин ыйыырыгар анаан медальницаны уонна төлөпүөн уурары оҥоро охсон, бэлэх ууннубут. Уолбут Айаал Горнай улууһун тириэньэрин кытта кэпсэтэн, кинилэри кытары кэлсибит эбит уонна Уус-Алдан улууһун аатын чиэстээхтик көмүскээтэ. Ол курдук, 80 киилэҕэ оҕолорго үһүс миэстэ буолла уонна оҕолорго муҥутуур кыайыылааҕы быһаарар киирсиигэ кимиэхэ да иннин биэрбэккэ кыайыыны ситистэ. Оҕобутун Айаалы ситиһиитинэн эҕэрдэлээн, “дойдуҥ дьоно куруутун аттыгар бааллар, соҕотох буолбатаххын” диэммит үөрэ-көтө өйөбүл буоллубут. Инникитин да күрэхтэргэ ситиһиилэри, төрөөбүт дойдуҥ чиэһин түһэн биэрбэккэ куруутун инники күөҥҥэ сырыт диэн алгыс тылларын анаатыбыт.

 

Анна Иванова, Б.Н. Андреев аатынан Элгээйитээҕи Айылҕа түмэлин салайааччыта,

Элгээйи нэһилиэгин дьокутаата, “Сунтаар уус алданнара” түмсүү Элгээйи куустатын салайааччыта.

Читайте дальше