Сунтаар улууһун үрүҥ көмүс кинигэтигэр саҥа дьиэ кэргэн киирдэ

Бүгүн, тохсунньу 21 күнүгэр, Сунтаардааҕы ГТАС салаатыгар икки бүк үөрүүлээх, бэлиэ түгэн тосхойдо. Ол курдук, улуус дьаһалтатын өйөбүлүнэн ГТАС хоһо саҥардыллан, саҥалыы тыыннанан аанын тэлэччи арыйда.

Хара маҥнайгыттан тэрилтэ хоһо үлэлии киириэҕиттэн ылата улахан өрөмүөн үлэтэ барбакка өр күүппүт баҕа санаалара бүгүн дьэ, туолла. Олохтоох уолаттар өрөмүөн үлэтин ылсан, оруобуна лоп курдук биир ый иһигэр бүтэрэн үлэни туттардылар. «Төһө да өрөмүөн үлэтэ бардар, ГТАС үлэһиттэрэ биир да күнү көтүппэккэ, үлэлиир сирбититтэн харыс да халбарыйбакка, табыгастаах сири булан дьон наадыйар докумуоннарын биэрэ олордубут. Хата, сэрэйбит курдук биир да киһи өрөмүөн үлэтин кэмигэр ыал буоларга сайыбылыанньа биэрбэтэ. Онон, биир да киһини ГТАС дьиэтиттэн туспа, туора тахсан ыал оҥорботубут», – диэн салайааччы Анна Григорьева күлэ-үөрэ үллэстэр.

Маны тэҥэ, саҥа сыл бастакы дьоро тэрээһинигэр 45 сыл бииргэ ыал буолан олорбут Надежда, Иван Поповтар дьиэ кэргэттэрин Сунтаар улууһун үрүҥ көмүс кинигэтигэр 108-с нүөмэринэн киллэрэн бэлиэтээтилэр. Үөрүүлээх быһыыга-майгыга улуус баһылыга Анатолий Григорьев, Сунтаар нэһилиэгин баһылыгын солбуйааччы Семен Николаев истиҥ эҕэрдэлэрин эттилэр.
Ыал аҕа баһылыга, РФ үтүөлээх бырааһа, СӨ доруобуйа харыстабылын туйгуна, Сунтаар улууһун уонна нэһилиэгин бочуоттаах олохтооҕо Иван Попов өр сыллар усталарыгар доруобуйа харыстабылын эйгэтигэр бэриниилээхтик үлэлээн билигин бочуоттаах сынньалаҥҥа олорор. Оттон, ыал ийэтэ, СӨ үлэ бэтэрээнэ Надежда Попова олох эдэр эрдэҕиттэн олоххо көрүүтэ ураты буолан, араас тэрээһиннэргэ көхтөөхтүк кыттар. Ону ааһан, буулдьанан ытыыны ордорон дьарыктанар. Поповтар улуус биир ытыктанар, киэн туттар ыала буолаллар.
Бу курдук, биир эмиэ өйгө-сүрэххэ хатанан хаалар бэлиэ түгэн олус истиҥник буолан ааста.

Елизавета ТИТОВА