СӨ култууратын туйгуна, СӨ култууратын үтүөлээх үлэһитэ, “Гражданскай килбиэн” бэлиэ хаһаайына, СӨ култууратын уонна ускуустубатын бочуоттаах үлэһитэ, Сунтаар, Ньурба улуустарын, Түбэй Дьаархан, Акана нэһилиэктэрин бочуоттаах олохтооҕо, дыраама уонна киинэ артыыһа идэлээх — Фрументий Софронов:
— Ааһан эрэр сыл үгүс үөрүүлээх, умнуллубат түгэннэрэнинэн баай диэххэ сөп. Ол курдук, ырыа-тойук аргыстаах “Уонна хаһан” диэн айар кэнсиэрим Дьокуускай куоракка Сэргэлээх уоттара култуура киинигэр олус бэрткэ буолан ааспыта. Икки кэнсиэри тэрийэн, барыта 1200 сүгүрүйээччи сылдьыбыта. Биир бэлиэ түгэнинэн 1988 с.тэрийбит “Аман өс” оҕо норуодунай тыйаатыра 35 сылын бэлиэтээбиппит. Бу үбүлүөйдээх сыл чэрчитинэн Түбэй Дьаархаҥҥа улуустааҕы «Аман өс» оҕолорго үс көрүҥүнэн көрүү-күрэс ыытыллан 200-чэ оҕо кыттыыны ылбыта. Ньурба улууһун кытары бииргэ үлэлэһэһэн Акана бөһүөлэгин кытта холбоһуктаах улахан кэнсиэри Сунтаарынан, Ньурбанан сылдьан тэрийбиппит. Арасыыйаҕа – Дьиэ кэргэн, Өрөспүүбүлүкэҕэ – Оҕо саас, улууспутугар – Аҕам саастаахтарга ытыктабыл сылларын чэрчитинэн «Икки көлүөнэ» диэн кэргэмминээн Нина Потаповалыын уонна Анита, Дуолан Трпофимовтары кытта Сунтаар, Ньурба улуустарын нэһилиэктэринэн кэнсиэртээбиппит. Дьон-сэргэ астынан, сэргээн, дуоһуйа сынньанан тарҕаспыттара. Ону тэҥэ, Ньурба улууһун култууратын бочуоттаах үлэһитэ аат иҥэрэннэр үөрүүм үксээтэ.
Көҥүл тустууга Арассыыйа биир бастыҥ, чулуу бөҕөһө, успуорт маастара Лев Павлов:
– Ааһан эрэр 2024 сыл миэхэ элбэх умнуллубат түгэннэри бэлэхтээтэ. Ол курдук, аан дойду, Арассыыйа улахан успуордун түһүлгэлэригэр ситиһиилээхтик кытынным, дойдум аатын дорҕоонноохтук ааттаттым. Мин кыайыыларбар биир дойдулаахтарым, миэхэ эрэнэр бүттүүн Саха сирин олохтоохторо улахан өҥөлөөхтөр. Эһиги итэҕэлгит, алгыс тылгыт, үтүө санааҕыт кыайыыга кынаттыыр. Саамай умнубат түгэмминэн, бу сайын от ыйыгар Сербия Нови-Сад куоратыгар 21-гэр диэри саастаахтарга көҥүл тустууга Европаҕа бастыыр иһин күрэхтэһиигэ чөмпүйүөн үрдүк аатын ылбытым буолар. Онтон да атын күрэхтэһиилэргэ кыаҕым, күүһүм баарынан кытынным. Успуорт эйгэтин сылы түмүктүүр тэрээһинигэр бастыҥ спортсмен аатын ылбытым соһуччу түгэнинэн буолла. Бу дьоһуннаах наҕараадам миигин элбэххэ эбээһинэстиир. Дьарыкпын өссө күүскэ салҕаан Саха сирин эрэ буолбакка, дойдубут аатын аан дойду таһымыгар ааттатыахпын баҕарабын. Кэлэр сыл барыбытыгар ситиһии көтөллөөх буоллун! Доруобай, дьоллоох буолуҥ!
Ааһан эрэр от күөх Луо сыла, Ыччат бэлиитикэтин отделын салайааччытыгар Трофим Ивановка ситииһини аҕалла.
Ол курдук, кини соторутааҕыта «СӨ ыччат бэлиитикэтин туйгуна» түөскэ кэтиллэр бэлиэни тутта. Ханнык баҕарар эйгэҕэ маннык үрдүк бэлиэни ылар улахан чиэс-бочуот уонна сыралаах үлэ түмүгэ буолар. Трофим төрөөбүт сылын бэлиэтэ — кутуйах. Ол курдук, сулустар билгэлэринэн бу бэлиэ Луону кытта доҕордуу сыһыаннаах эбиттэр. Ол да иһин буолуо, ааһан эрэр сылга кутуйах мындыр толкуйунан, тулалыыр дьону кытта алтыһарга болҕомтотун ууран, уопсастыбаҕа убаастабылы ылан бар дьоҥҥо биһирэммитэ. Маны тэҥэ, кини салайар Ыччат бэлиитикэтин отдела араас хабааннаах бырайыактарга кыттан олус таһаарыылаахтык үлэлээтилэр. Манна улуус, өрөспүүбүлүкэ, дойду таһымнаах куоҥкурустарга, граннарга ыччаты кытыннаран, кинилэр идиэйэлэрин олоххо киллэриигэ үлэлэстилэр. Быйыл Сунтаар уонна Хоро нэһилиэктэрэ Ил Дархан граныгар кыайыылаах буоланнар нэһилиэктэригэр уопсайа 1.300.000 солкуобайы киллэрдилэр. Маны тэҥэ, улуус 9 нэһилиэгэ «ТОС» анал бырагырааматыгар социальнай тэрээһиннэри ыытыыга, чөл олоҕу көҕүлүүр бырайыактары суруйаннар 767.048 солкуобайы туһаннылар. Бу курдук, аныгы кэм ирдэбилигэр сөп түбэһэн, сөпкө дьаһанан, саҥа бырайыактары олоххо киллэриигэ, олох хаачыстыбата тупсарыгар атын да хайысхалаах үлэлэри тиһигин быспакка ыыталлар.
Биир улахан ситиһиилэрэ, Саха сирин ыччатын түмэр өрөспүүбүлүкэтээҕи тэрээһиҥҥэ сыл түмүгүнэн «Лучший муниципальный район в сфере молодежной политики и патриотического воспитания граждан» диэн Анал аат хаһаайына буоллулар уонна 100000 солк. суумалаах сэртипикээтинэн наҕараадаланнылар.
Бу курдук, ыччаты биир санааҕа түмэр, инникигэ сирдиир, көмө буолар салалта быйылгы дьылга олус таһаарыылаахтык үлэлээтэ. Инникитин даҕаны улэтин тэтимин ыһыктыбакка, өссө күүрээннээхтик айарга-тутарга, үлэлииргэ бэлэмнэр.
«Сунтаар сонуннара» хаһыат