Ахсынньы 14 күнүгэр С.А. Зверев аатынан улуустааҕы норуот айымньытын киинигэр Сунтаар улууһугар быйыл Арассыыйаҕа биллэриллибит Педагог уонна Аҕа сүбэһит сылын түмүктүүр үөрүүлээх тэрээһин буолла. Бу үөрэх эйгэтигэр таһаарыылаах үлэлээхтэри, бастыҥнары чиэстиир тэрээһин П.Х.Староватов аатынан Элгээйи орто оскуолатын алын кылаас учууталлара Иван Арбита «Учуутал санаалара» диэн хоһооннорунан саҕаланна. Салгыы саалаҕа мустан олорооччулар РФ үөрэҕин миниистирэ Сергей Кравцов педагог идэлээхтэргэ эҕэрдэтин экраҥҥа көрдүбүт.
Сунтаар улууһун Аҕа баһылыга Анатолий Григорьев эҕэрдэтин кэннэ наҕараадалааһыҥҥа киирдилэр. Үөрэх эйгэтигэр өр сыллаах бэриниилээх, таһаарыылах үлэлэрин иһин «Саха Өрөспүүбүлүкэтин үөрэҕин Бочуоттаах бэтэрээнэ» бэлиэни туттулар: Герасимова Тамара, Сунтаар алын сүһүөх оскуолатын учуутала, Зинаида Леонтьева, Тойбохойдооҕу «Ньургуһун» оҕо сайдар киинин иитээччитэ уонна Валентина Петрова, Бордоҥ орто оскуолатын бэтэрээн учуутала. Сунтаар улууһун үөрэҕириитин сайдыытыгар таһаарыылаах үлэтин иһин Сунтаардааҕы технологическай колледж дириэктэрэ Гаврил Михайлов «Саха сирин инники эрэлэ» бэлиэнэн наҕараадаланна.
Быйыл үөрэх эйгэтигэр СӨ үөрэх уонна билим министиэристибэтэ «Саха Өрөспүүбүлүкэтин инники көлүөнэлэрин пуондатын» анал бириэмийэтигэр ыыппыт күрэһин түмүгүнэн анал кыайыылаах дипломунан Наталья Максимова, Күндэйэ орто оскуолатын биология уонна химия учуутала, Алена Николаева, Сунтаардааҕы «Ньургуһун” оҕо сайдар киинин уһуйааччыта наҕараадаланнылар.
Спорт эйгэтигэр өр сыллаах ситиһиилээх үлэтин иһин СӨ Физкультура хамсааһынын 100 сыллаах үбүлүөйдээх анал бэлиэтин Николаев Юрий Ивановичка, Элгээйи орто оскуолатын бэтэрээн учууталыгар, туттардылар.
Үөрүүлээх тэрээһиҥҥэ мустан олорооччулары СӨ Судаарыстыбаннай мунньаҕын Хонтуруоллуур кэмитиэтин бэрэсэдээтэлэ Андрей Николаев, СӨ Судаарыстыбаннай мунньаҕын дьокутаата, СӨ “Барҕарыы” национальнай пуондатын салайааччыта Афанасий Постников, СӨ Норуот учуутала, Сунтаардааҕы политехническай лицей дириэктэрэ Олег Сосин эҕэрдэлээн тылларын эттилэр. Андрей Николаев СӨ социальнай сайдыытыгар үтүөтүн иһин, СӨ Ил Түмэн Судаарыстыбаннай мунньаҕын Бочуотунай Грамотатынан Сунтаар улууһун үөрэҕин салалтатын салайааччы Альберт Ивановка туттарда.
Быйыл улуус таһымыгар «Педагог уонна Аҕа сүбэһит” сылынан уопсастыбаннас, дьон-норуот аһаҕас куоластааһынынан Учуутал күнүгэр сыһыаран “Бастыҥ Аҕа сүбэһит” күрэс ыытыллыбыта. Бу бириэмийэ кыайыылаахтарын чиэстиир түгэн бүгүн тосхойдо. Ол курдук, улуус бу дьоһун бириэмийэтин туттулар: Валентина Винокурова, Петр Хрисанфович Староватов аатынан Элгээйи орто оскуолатын нуучча тылын уонна литературатын учуутала, Анна Иванова, Сунтаар 1 №-дээх оскуолатын математикаҕа учуутала уонна Людмила Мохова, Тойбохойдооҕу “Ньургуһун” оҕо сайдар киинин иитээччитэ.
Салгыы Сунтаар улууһун Аҕа баһылыга Анатолий Григорьев үөрэх араас хайысхаларынан анал бириэмийэлэри туттартаата.
Тэрээһини сааланы толору мустубут дьон туран эрэ “Төрөөбүт дойдубут туһунан ырыаны” уопсай ыллаан түмүктээтилэр.
Марфа ИВАНОВА.