Сунтаар нэһилиэгин дьаһалтата бэйдиэ сылдьар ыттары тутууга, быстах кэмҥэ анал питомникка олохтуурга үбүлээһинин былырыыҥҥытааҕар уон төгүл элбэттэ. Үбүлээһини өрөспүүбүлүкэ ветеринарияҕа департамена көрдө. Ол курдук, былырыын 5 эрэ бэйдиэ сылдьар ыты анал питомникка туппут буоллахтарына, билигин 51 ыкка стерилизация, кастрация ыытыахтара уонна анал питомникка тутан көрүөхтэрэ-харайыахтара. Нэһилиэк иһигэр бэйдиэ cылдьар ыттары олохтуур анал питомник 50 вольердаах. Ыттар кыһыҥҥы өттүгэр улахан анал дьиэҕэ, онтон халлаан сылаас кэмигэр тимир сиэккэ вольердарга туруохтара.
Бэйдиэ сылдьар ыттары тутууга эмиэ саҥа сүүрээн киириэҕэ. Бу соторутааҕыта нэһилиэк баһылыгын эбээһинэһин толорооччу Семен Николаев Дьокуускай куоракка ыттары тутуу хайдах барарын бэйэтэ көрөн-истэн, билсэн кэлбит, тустаах дьону кытта кэпсэппит. Ол курдук, бэйдиэ сылдьар ыттар мустар сирдэригэр анал мэҥиэлээх килиэккэлэр туруохтара.
Олохтоох дьон бу килиэккэлэри тыыппаккытыгар, миэстэтин уларыппаккытыгар ыҥыраллар. Семен Николаев кэпсээбитинэн: «Хаһаайыннаах ыт бэйдиэ сылдьан быстах кэмҥэ питомникка тутуллан киирдэҕинэ, хаһаайыны ытын көрүүтэ-истиитэ суох сырытыннарбытын иһин эппиэтинэскэ тардыахтара, ону тэҥэ питомникка турбутун иһин күнүнэн харчытын төлөтөбүт. Онон өссө төгүл санатабын, хаһаайыннаах ыт бэйдиэ сылдьара көҥүллэммэт».
Сунтаар нэһилиэгэр ыт ахсаана чопчулана илик. Ол да буоллар, быһа холоон нэһилиэккэ хас ыал олорорунан биирдии ыты аахтахха үлүгэр элбэх ыт саастаах дьоҥҥо, оҕолорго кутталы үөскэтэр.
Мира АФАНАСЬЕВА